हंसराज,प्रतिनिधी भंडारा :- ओबीसींची जातीनिहाय जनगणना करण्यात यावी, एससी, एसटी व ओबीसी विद्यार्थ्यांची शैक्षणिक फसवणूक थांबवावी आणि २०११ पूर्वीच्या शिक्षकांना ‘टीईटी’ (TET) मधून सवलत द्यावी, या प्रमुख मागण्यांसाठी आज २३ मार्च रोजी भंडाऱ्यात विशाल मोर्चा काढण्यात आला. भारत मुक्ती मोर्चा आणि राष्ट्रीय पिछडा ओबीसी वर्ग मोर्चाच्या नेतृत्वाखाली निघालेल्या या मोर्चाने आज जिल्हाधिकारी कार्यालयाचा परिसर दणाणून सोडला होता.
आज दुपारी शहरातील ऐतिहासिक छत्रपती शिवाजी महाराज पुतळा येथून या भव्य मोर्चाला सुरुवात झाली. हातात विविध मागण्यांचे फलक आणि सरकारच्या धोरणांचा निषेध करणाऱ्या घोषणा देत आंदोलक मुख्य मार्गावरून बस स्थानक चौकामार्गे जिल्हाधिकारी कार्यालयावर धडकले. या आंदोलनात मोठ्या संख्येने ओबीसी समाज बांधव, विद्यार्थी, पालक आणि शिक्षक आपल्या कुटुंबासह सहभागी झाले होते.
प्रमुख मागण्या :
🔹 केंद्र सरकारने जनगणनेसाठी जे नोटिफिकेशन काढले आहे, त्यात ओबीसी जातींसाठी स्वतंत्र रकाना नसल्याने ही ओबीसींची दिशाभूल आहे. सरकारने त्वरित जातीनिहाय जनगणना करावी, अशी मागणी करण्यात आली.
🔹 युजीसी (UGC) कायद्याबाबत सुप्रीम कोर्टात केंद्र सरकारने कमकुवत युक्तिवाद केल्यामुळे बहुजन समाजातील विद्यार्थ्यांचे मोठे नुकसान झाले आहे, असा आरोप यावेळी करण्यात आला.
🔹 २०११ पूर्वी सेवेत रुजू झालेल्या शिक्षकांना टीईटी (शिक्षक पात्रता परीक्षा) अनिवार्य करून त्यांच्यावर अन्याय केला जात आहे. या शिक्षकांना या परीक्षेतून कायमस्वरूपी वगळण्यात यावे, ही मागणी प्रामुख्याने मांडण्यात आली.
जिल्हाधिकारी कार्यालयासमोर मोर्चा पोहोचल्यानंतर एका शिष्टमंडळाने जिल्हाधिकाऱ्यांची भेट घेऊन आपल्या मागण्यांचे निवेदन सादर केले. केंद्र आणि राज्य सरकारने या मागण्यांकडे तातडीने लक्ष न दिल्यास आगामी काळात अधिक तीव्र आंदोलन छेडण्याचा इशारा यावेळी देण्यात आला.
या मोर्चाचे नेतृत्व भारत मुक्ती मोर्चाचे जिल्हाध्यक्ष, राष्ट्रीय पिछडा ओबीसी वर्ग मोर्चाचे जिल्हाध्यक्ष आणि जिल्हा प्रभारी यांच्यासह स्थानिक पदाधिकाऱ्यांनी केले. आजच्या या मोर्चाने प्रशासनाचे लक्ष वेधून घेतले असून, सर्वसामान्य नागरिकांमध्येही या विषयांची मोठी चर्चा दिसून आली.