मुंबई :- अन्न व औषध प्रशासनाचे आयुक्त म्हणून तुकाराम मुंढे यांनी कारभार हाती घेतल्यापासून राज्यभर भेसळखोरांविरोधात कारवाई सुरू असून त्यांनी एफडीएला देखील सुतासारखं सरळ केलंय.. सणासुदीच्या काळात मिठाई, दुग्धजन्य पदार्थ, मसाले आणि खाद्यतेलाची मागणी वाढते. त्यामुळे एफडीए कडून विशेष तपासणी मोहिम राबवली जात आहे. अशातच आता एफडीएच्या दोन जबाबदार अधिकाऱ्यांवर शिस्तभंगाच्या कारवाईची शिफारस करण्यात आली आहे. त्यामुळे आता चर्चेला उधाण आलं आहे.
17 लाख रुपयांचं संशयास्पद दूध पावडर प्रकरण
तुकाराम मुंढे यांच्यासह नाशिक विभागाने धडक कारवाई सुरू केली असून चार जिल्ह्यांत मागील 10 दिवसांत केलेल्या 36 कारवायांमध्ये 5 कोटी 40 लाख 16 हजार 621 रुपयांचा मुद्देमाल जप्त करण्यात आला. त्यानंतर एफडीएचं कौतुक करण्यात आलं होतं. अशातच सिन्नर तालुक्यातील पुतळेवाडी येथे उघडकीस आलेल्या 17 लाख रुपयांच्या संशयास्पद दूध पावडर साठा प्रकरणात अन्न व औषध प्रशासनातील दोन जबाबदार अधिकाऱ्यांवर शिस्तभंगाच्या कारवाईची शिफारस करण्यात आली आहे.
कर्तव्य बजावण्यात जाणीवपूर्वक टाळाटाळ
एफडीएचे सहाय्यक आयुक्त दिनेश तांबोळी आणि अन्नसुरक्षा अधिकारी संदीप तोरणे यांच्यावर चौकशी बसवण्यात आली होती. दोघांन विहित कायदेशीर कर्तव्य बजावण्यात जाणीवपूर्वक टाळाटाळ केल्याचं चौकशीमध्ये समोर आलं आहे. जुलै महिन्यात पुतळेवाडी इथं टाकलेल्या छाप्यात मोठ्या प्रमाणात दूध पावडर जप्त झाली होती. यात मोठ्या प्रमाणात भेसळ आढळून आली होती.
तुकाराम मुंडे घेणार अंतिम फैसला
या प्रकरणातील हेमंत पवार यांच्यावर पूर्वीही दूध भेसळीचे गुन्हे दाखल असताना, अधिकाऱ्यांनी ठोस कारवाई करण्याचे टाळलं. तक्रारदार भाऊसाहेब बैरागी यांनी अधिकाऱ्यांच्या या भूमिकेविरोधात वरिष्ठ पातळीवर सातत्याने पाठपुरावा केला होता. सहाय्यक आयुक्त एम. यू. माने यांनी या प्रकरणात चौकशी केली. या चौकशीत दोन्ही अधिकाऱ्यांनी कर्तव्यात हेतुपुरस्सर चूक केल्याचं स्पष्ट झालं आहे. नाशिक विभागाने हा अहवाल आयुक्त तुकाराम मुंढे यांच्याकडे पाठवला असून आता तुकाराम मुंडे यावर अंतिम फैसला घेतील.