गोंदिया :- गणेशोत्सवाच्या काळात ध्वनिप्रदूषणाला आळा घालण्यासाठी गोंदिया पोलिसांनी नियमांचे उल्लंघन करणाऱ्या डीजे चालकांवर कारवाई सुरू केली आहे. गोंदिया शहर आणि रामनगर पोलीस ठाण्याच्या हद्दीत निर्धारित ध्वनिमर्यादेपेक्षा अधिक आवाजात डीजे वाजविल्याप्रकरणी पोलिसांनी स्वतंत्र प्रकरणे दाखल केली आहेत. या कारवाईत आतापर्यंत तीन जणांविरुद्ध गुन्हे नोंदविण्यात आल्याची माहिती आहे.
नियमांची आधीच दिली होती माहिती
गणेशोत्सव सुरू होण्यापूर्वी पोलीस अधीक्षक गोरख भामरे यांनी लाऊडस्पीकर व डीजे चालक तसेच मालकांची बैठक घेतली होती. या बैठकीत ध्वनिप्रदूषणासंदर्भातील नियम आणि त्याचे पालन करण्याच्या सूचना देण्यात आल्या होत्या. निर्धारित ध्वनिमर्यादेतच ध्वनीप्रक्षेपण करण्याचे स्पष्ट निर्देश पोलिसांकडून देण्यात आले होते.
नियमभंग झाल्यास थेट कारवाई
बैठकीदरम्यान सर्वोच्च न्यायालय आणि मुंबई उच्च न्यायालयाच्या निर्देशांसह ध्वनिप्रदूषण (नियमन व नियंत्रण) नियमांची माहिती डीजे चालक आणि मालकांना देण्यात आली होती. सार्वजनिक ठिकाणी ध्वनीप्रक्षेपण करताना निर्धारित मर्यादांचे पालन करण्याचे आवाहनही करण्यात आले होते. मात्र, त्यानंतरही काही ठिकाणी मोठ्या आवाजात डीजे वाजविल्याचे आढळून आल्यानंतर पोलिसांनी संबंधितांविरुद्ध कायदेशीर कारवाई केली.
गणेशोत्सवाच्या काळात ध्वनिप्रदूषण नियंत्रणासाठी पोलिसांकडून तपासणी आणि कारवाई सुरूच राहणार असून, नियमांचे उल्लंघन करणाऱ्यांवर परिस्थितीनुसार थेट कायदेशीर कारवाई केली जाईल, असा इशारा पोलिसांनी दिला आहे.