मुंबई १ : छत्रपती शिवाजी महाराज आंतरराष्ट्रीय विमानतळावर (CSMIA) मुंबई हवाई सीमाशुल्क विभागाने मोठी कारवाई करत आंतरराष्ट्रीय ड्रग्ज तस्करीचा पर्दाफाश केला आहे. २९ आणि ३० जुलै रोजी केलेल्या विशेष मोहिमेत, अधिकाऱ्यांनी बँकॉकहून आलेल्या चार प्रवाशांकडून तब्बल ८ कोटी रुपये किमतीचा ८ किलोहून अधिक हायड्रोपोनिक गांजा जप्त केला आहे.
ही कारवाई दोन वेगवेगळ्या प्रकरणांमध्ये करण्यात आली. पहिल्या प्रकरणात, गुप्त माहितीच्या आधारे सीमाशुल्क अधिकाऱ्यांनी व्हिएतजेट फ्लाइट क्रमांक VZ760 ने आलेल्या तीन प्रवाशांना अडवले. त्यांच्या सामानाची तपासणी केली असता, त्यांच्या ट्रॉली बॅगमध्ये अत्यंत चलाखीने लपवलेला १.९९० किलो हायड्रोपोनिक गांजा सापडला. हा गांजा व्हॅक्यूम सील केलेल्या काळ्या आणि पारदर्शक प्लास्टिकच्या पॅकेटमध्ये ठेवण्यात आला होता, ज्याची किंमत अंदाजे २ कोटी रुपये आहे.
दुसऱ्या एका प्रकरणात, इंडिगो फ्लाइट क्रमांक ६E१०६० ने बँकॉकहूनच आलेल्या एका प्रवाशाच्या संशयास्पद हालचालींमुळे अधिकाऱ्यांनी त्याला थांबवले. त्याच्या चेक-इन बॅगची तपासणी केली असता, त्यात ६.०२२ किलो हायड्रोपोनिक गांजा आढळला, ज्याची किंमत सुमारे ६ कोटी रुपये आहे.
या दोन्ही प्रकरणांमध्ये, एकूण ८ किलोहून अधिक हायड्रोपोनिक गांजा जप्त करण्यात आला असून, या चारही प्रवाशांना एनडीपीएस (Narcotic Drugs and Psychotropic Substances) कायदा, १९८५ अंतर्गत अटक करण्यात आली आहे. सीमाशुल्क विभागाच्या या कारवाईमुळे आंतरराष्ट्रीय ड्रग्ज तस्करीवर मोठा आघात झाला आहे. पुढील तपास सुरू असून, या रॅकेटमध्ये आणखी कोणाचा सहभाग आहे का, याचा शोध घेतला जात आहे.
