मुंबई :- पहिली लढाई ही निवडणूक आयोगाच्या कारभाराविरोधात आहे ती अधिक ताकदीने एकजुटीने करावी लागेल. आयोगाला हाताला धरून एसआयआर आणि मतदार याद्या यात घोटाळे करून भाजपने निवडणुका कशा जिंकल्या हे आता दिसलं आहे. आता यातला पुढचा टप्पा आहे तो म्हणजे ईव्हीएम विरोधात. स्वायत्त नसलेला निवडणूक आयोग आणि ईव्हीएम ही दोन अस्त्र भाजप सरकारची आहेत. आता सगळ्या विरोधी पक्षांनी ईव्हीएमच्या ऐवजी बॅलेट पेपरवर निवडणुका व्हायला पाहिजेत यासाठी जन आंदोलन उभं केलं पाहिजे, अशी आर्त साद मनसे अध्यक्ष राज ठाकरे यांनी देशातील विरोधी पक्षांना घातली आहे. निवडणूक आयोगातील मुख्य निवडणूक आयुक्त ज्ञानेश कुमार यांच्या एकाधिकारशाहीने निर्माण झालेली बेबंदशाही दोन निवडणूक आयुक्तांनी लेखी आक्षेप नोंदवत समोर आणल्यानंतर देशात खळबळ उडाली आहे. इंडियन एक्स्प्रेसच्या अहवालानंतर देशात खळबळ उडाली आहे. आयोगाने इभ्रत वेशीला टांगल्यानंतर खुलाशाचा केविलवाणा प्रयत्न केला, पण तो सुद्धा ज्या गंभीर प्रश्नांकडे लक्ष वेधले होते त्यावर चकार शब्द काढलेला नाही. या सर्व पार्श्वभूमीवर राज ठाकरे यांनी सोशल मीडियात सविस्तर पोस्ट ज्ञानेश कुमारांच्या कार्यकाळातील निवडणुकीवर संशय व्यक्त केला आहे.
जे सरकार निवडून आलं त्या सरकारने राजीनामा द्यायला हवा
त्यांनी म्हटलं आहे की, मुख्य निवडणूक आयुक्तांचा राजीनामा हा तर व्हायलाच हवा पण या असल्या कणाहीन निवडणूक आयोगाला हाताशी धरून जे सरकार निवडून आलं त्या सरकारने राजीनामा द्यायला हवा. आम्ही बहुमताने निवडून आलोत असं सांगणाऱ्या सरकारच्या निवडीनंतर रस्त्यावर कुठेही जल्लोष दिसला नव्हता यातच सगळं स्पष्ट होत आहे. हेच मी केव्हापासून सांगतोय. त्यामुळे जर निवडणूक आयोग अपेक्षेप्रमाणे स्वायत्त झाला तर आणि तरच सत्ताधाऱ्यांना जमिनीवर आणता येईल हेच अंतिम सत्य आहे हे सगळ्यांनी लक्षात घ्या नाहीतर ही लढाई अंतहीन आहे. राज ठाकरे यांनी पुढे म्हटलं आहे की, 2025 च्या अखेरीस, महापालिका निवडणुकांच्या आधी जेव्हा महाराष्ट्रातील विरोधी पक्षांचे नेते आम्ही राज्याच्या मुख्य निवडणूक आयुक्तांना आणि त्यांच्या सहकाऱ्यांना भेटायचो तेव्हाच लक्षात यायचं की यांना कुठलेच अधिकार नाहीत. हे मी जाहीरपणे अनेकदा बोललो आहे, निवडणूक आयोगाच्या कारभारावर मी आणि माझ्या पक्षाने उघडउघड शंका म्हणा आरोप म्हणा काहीही म्हणा, पण ते आम्ही केलेत. आम्ही जे बोलत होतो त्याची सत्यता या बातमीत तुम्हाला सापडेल.
राज्य निवडणूक आयोग सोडाच जिथे केंद्रीय निवडणूक आयोगातील 2 आयुक्तांनाच गुंडाळून ठेवलं आणि त्यांना अंधारात ठेऊन किंवा त्यांच्या मताला अजिबात किंमत न देता जे निर्णय राबवले जात आहेत यावरून एक गोष्ट स्वच्छ आहे निवडणूक आयोग स्वायत्त असायला हवा हे आता पुस्तकापुरतं मर्यादित आहे. स्वायत्ततेची व्याख्या भारतीय जनता पक्षाच्या अधीन अशी असेल तर तो स्वायत्त आहे, अन्यथा नाही. निवडणूक आयुक्त सुखबीर सिंग संधू आणि विवेक जोशी यांनी जे आक्षेप नोंदवलेत ते गंभीर आहेत, ते नाकारणं मुख्य निवडणूक आयुक्तांना म्हणजेच ज्ञानेश कुमारांना शक्यच नाही, त्यामुळे ते जे वागले यामागचा कर्ताकरविता नक्की कोण होता, आहे इतकं सांगितलं तरी पुरेसं आहे.