– विभागीय सहनिबंधकांकडे निवेदन; कारवाई न झाल्यास जिल्हा बँकेवर मोर्चाचा इशारा
पंकज परशुरामकर,नवेगाव बांध :– गोंदिया जिल्हा मध्यवर्ती सहकारी बँकेच्या संचालक मंडळात दहा वर्षांपेक्षा अधिक काळ कार्यरत असलेल्या संचालकांना पदावरून हटवून नियमानुसार कारवाई करण्यात यावी, अशी मागणी करण्यात आली आहे. यासंदर्भात विभागीय सहनिबंधक, सहकारी संस्था, नागपूर यांच्याकडे जिल्हा उपनिबंधक सहकारी संस्था, गोंदिया यांच्या माध्यमातून निवेदन सादर करण्यात आले आहे.
निवेदनात नमूद केल्यानुसार, शासनाच्या तसेच रिझर्व्ह बँकेच्या धोरणानुसार सहकारी संस्थांमध्ये आवश्यक ती कार्यवाही करण्यात येत आहे. त्याच धर्तीवर गोंदिया जिल्हा मध्यवर्ती सहकारी बँकेच्या संचालक मंडळात दहा वर्षांपेक्षा अधिक काळ कार्यरत असलेल्या संचालकांवरही नियमानुसार कारवाई करण्यात यावी, अशी मागणी करण्यात आली आहे.
जिल्ह्यातील तसेच तालुकास्तरीय सहकारी संस्थांचे अध्यक्ष व संचालक यांच्यासाठी नियमांची अंमलबजावणी केली जात असताना जिल्हा मध्यवर्ती सहकारी बँकेच्या संचालक मंडळालाही तेच नियम लागू करावेत, अशी भूमिका निवेदनकर्त्यांनी मांडली आहे. बँकेच्या कारभारात दीर्घकाळ एकाच व्यक्तींचे संचालक म्हणून अस्तित्व राहिल्याने नवीन नेतृत्वाला संधी मिळण्याबरोबरच कारभारातील पारदर्शकता आणि उत्तरदायित्वाचा प्रश्न निर्माण होत असल्याचे निवेदनात म्हटले आहे.
तसेच बँकेच्या भागभांडवलाशी संबंधित बाबींवरही निवेदनातून प्रश्न उपस्थित करण्यात आले आहेत. बँकेतील मोठ्या प्रमाणातील भागभांडवल, त्यासंबंधीचे व्यवहार आणि संचालक मंडळाचा कारभार याबाबत आवश्यक ती तपासणी करून नियमांचे पालन करण्यात यावे, अशी मागणी करण्यात आली आहे.
सदर मागणीवर तातडीने कार्यवाही न झाल्यास गोंदिया जिल्ह्यातील कर्जदार, बिगरकर्जदार, भागभांडवलधारक, विविध कार्यकारी सहकारी संस्थांचे पदाधिकारी व सभासद मोठ्या संख्येने एकत्र येऊन जिल्हा मध्यवर्ती सहकारी बँकेवर मोर्चा काढतील, असा इशारा निवेदनातून देण्यात आला आहे. कार्यवाही न झाल्यास या निवेदनालाच मोर्चाचे पत्र समजण्यात यावे, असेही निवेदनात नमूद करण्यात आले आहे.
आता या मागणीवर सहकार विभागाकडून कोणती कार्यवाही केली जाते, याकडे जिल्ह्यातील सहकार क्षेत्राचे लक्ष लागले आहे.