– आयुक्तांच्या हस्ते वाहनांचे लोकार्पण
नागपूर :- नागपूर शहराला स्वच्छ, सुंदर आणि हरित साकारण्याच्या दृष्टीने नागपूर महानगरपालिकेच्या घनकचरा व्यवस्थापन विभागाने महत्त्वपूर्ण पाऊल टाकले आहे. मनपाच्या कचरा संकलन वाहनांच्या ताफ्यात २० नवीन विद्युत वाहनांचा समावेश करण्यात आला आहे. मनपा आयुक्त तथा प्रशासक डॉ. अभिजीत चौधरी यांच्या हस्ते सोमवारी (ता. ०३) ‘एजी एन्व्हायरों’ एजन्सीद्वारा संचालित या नवीन ई-वाहनांचे लोकार्पण करण्यात आले. त्यामुळे घराघरातून (डोअर-टू-डोअर ) कचरा संकलित करणाऱ्या वाहनांची संख्या आता २६३ इतकी झाली आहे.
मनपा मुख्यालयातील छत्रपती शिवाजी महाराज प्रशासकीय इमारतीच्या दालनात आयोजित छोटेखानी समारंभात मनपाच्या अतिरिक्त आयुक्त वसुमना पंत, उपायुक्त राजेश भगत, मुख्य स्वच्छता अधिकारी डॉ. गजेंद्र महल्ले,’एजी एन्व्हायरों’चे अध्यक्ष महेंद्र अनंथुला, पश्चिम विभाग प्रमुख बिजू थॉमस, प्रकल्प प्रमुख समीर टोणपे आणि ऑपरेशन व्यवस्थापक प्रवीण चव्हाण यांच्यासह इतर अधिकारी व कर्मचारी उपस्थित होते.
एजी एन्व्हायरो एजन्सीद्वारे शहरातील लक्ष्मीनगर, धरमपेठ, हनुमान नगर, धंतोली आणि नेहरू नगर झोनमध्ये कचरा संकलित केला जातो. नव्याने समावेश करण्यात आलेल्या या २० ई-वाहनांचा उपयोग घराघरातून निघणारा ओला-कोरडा वर्गीकृत कचरा योग्यप्रकारे आणि कार्यक्षमतेने हाताळण्यासाठी होणार आहे. पर्यावरणपूरक असल्याने ही वाहने कार्बन उत्सर्जन कमी करण्यास मदत करतील आणि घनकचरा व्यवस्थापन प्रक्रिया अधिक शाश्वत करण्यावर भर देतील.
