रेल्वे उड्डाणपुलाजवळ खड्ड्यात बुडून चार मुलांचा मृत्यू
यवतमाळ २२ : यवतमाळ जिल्ह्यातील दारव्हा शहरात बुधवारी संध्याकाळी घडलेल्या एक अत्यंत दुःखद आणि धक्कादायक घटनेत बुडून चार निष्पाप मुलांचा मृत्यू झाला. रेल्वे उड्डाणपुलाच्या बांधकामस्थळी पावसाचे पाणी साचलेल्या खड्ड्यात ही घटना घडली. डॉक्टरांनी त्यांना यवतमाळ येथे मृत घोषित केले असून, या घटनेने संपूर्ण परिसरात हळहळ व्यक्त होत आहे.
अपघातात मृत्यू पावलेली मुले म्हणजे –
रिहान अस्लम खान (१३), गोलू पांडुरंग नारनवरे (१०), सौम्या सतीश खडसन (१०), आणि वैभव आशिष बोधले (१४) – हे सर्व स्थानिक रहिवासी होते.
घटनेचा तपशील
मिळालेल्या माहितीनुसार, दारव्हा-नेर रस्त्यावर वर्धा-नांदेड रेल्वे लाईनच्या उड्डाणपुलाचे बांधकाम सुरू आहे. याच दरम्यान खोदलेला मोठा खड्डा पावसाच्या पाण्याने भरला होता. बुधवारी सायंकाळी ५.३० च्या सुमारास ही मुले आंघोळीसाठी त्या खड्ड्यात उतरली, मात्र त्यांना पोहता न आल्याने ते पाण्यात अडकले आणि बुडू लागले. आजूबाजूच्या नागरिकांनी तातडीने मदत करत मुलांना बाहेर काढले आणि प्राथमिक उपचारानंतर यवतमाळ रुग्णालयात हलवले, परंतु डॉक्टरांनी त्यांना मृत घोषित केले.
शहरात हळहळ; पोलिस तपास सुरू
या घटनेने संपूर्ण दारव्हा शहरात शोककळा पसरली असून, कुटुंबीयांवर दुःखाचा डोंगर कोसळला आहे. पोलिसांनी घटनास्थळी धाव घेतली असून गुन्हा नोंद करून तपास सुरू केला आहे. या प्रकारामुळे सार्वजनिक बांधकामस्थळी सुरक्षेच्या उपाययोजनांकडे प्रशासनाचे दुर्लक्ष झाले असल्याची टीका होत आहे. स्थानिकांनी या गंभीर दुर्लक्षितपणाबद्दल तीव्र संताप व्यक्त केला आहे.