बेला ४ : नागपूर ग्रामीणचे पोलीस अधीक्षक हर्ष पोद्दार यांचे मार्गदर्शनाखाली बेला पोलीस स्टेशनच्या वतीने ठाणेदार चेतनसिंग चौहाण व उपनिरीक्षक संतोष चव्हाण यांनी महालगाव आष्टा व रामा गावाला भेट दिली. त्यांनी सायबर गुन्हे कसे घडतात, ऑनलाइन फसवणूक कशी होते ? याबाबत सभेत मार्गदर्शन करून सावध राहण्याचे ग्रामस्थांना आवाहन केले. पोलीस अधीक्षक यांचे नेतृत्वात अप्पर पोलीस अधीक्षक अनिल मस्के व उपअधीक्षक दीपक अग्रवाल यांचे सूचनानुसार ठाणेदार चौहाण यांचेसह बेला पोलिसांनी विविध गावांना भेटी दिल्या. त्यांनी भेटीत आष्टा,रामा व महालगाव येथील नागरिकांच्या अडीअडचणी जाणून घेतल्या व त्यावर उपाययोजना सांगितल्या. सोशल मीडिया व ऑनलाइन गैरव्यवहार कसे घडतात व त्यापासून सावध कसे राहावे. याविषयी ठिक ठिकाणच्या सभेत ठाणेदार व उपनिरीक्षक यांनी सविस्तर मार्गदर्शन केले. त्याचप्रमाणे गावात अनोळखी येणाऱ्या माणसांची तात्काळ खबर पोलिसांना देण्याचे आवाहन केले. या खेडे गावांना भेट देत असताना त्यांनी ३ दारू विक्रेत्यांवर व २ जुगार अड्ड्यांवर धाडी टाकल्या असून त्या आरोपी विरुद्ध गुन्हे दाखल केले. यातून बेला पोलिसांनी अवैद्य धंदे करणाऱ्यांच्या मुसक्या आवळल्या. त्यामुळे त्यांचे धाबे दणाणले.