दाताळा येथील नाल्यात तरुणाचा मृतदेह आढळला
चंद्रपूर १४ : चंद्रपूर जिल्ह्यात गेल्या २४ तासांपासून सुरू असलेल्या सततच्या मुसळधार पावसामुळे नद्या, नाले आणि कालव्यांचे पाणी धोक्याच्या पातळीपर्यंत पोहोचले आहे. या दरम्यान, दाताळा येथील एका मोठ्या कालव्यात एक अज्ञात तरुणाचा मृतदेह तरंगताना आढळून आला, त्यामुळे खळबळ उडाली आहे.
प्राथमिक माहितीनुसार, बुधवारी रात्री देवडा गावाजवळील नाल्याजवळ एक तरुण पावसामुळे घसरून नाल्यात पडला आणि जोरदार प्रवाहात वाहून गेला. गुरुवारी सकाळी, दाताळा परिसरातील स्थानिक नागरिकांनी एका तरुणाचा मृतदेह नाल्यात तरंगताना पाहिल्यानंतर तात्काळ तहसील प्रशासनाला माहिती दिली. सूचना मिळताच तहसीलदार विजय पवार यांनी आपल्या पथकासह घटनास्थळी धाव घेतली. स्थानिक ग्रामस्थांच्या मदतीने मृतदेह बाहेर काढण्यात आला. प्रशासनाने तत्काळ शोधमोहीम राबवून संबंधित तरुणाचा मृतदेह शवविच्छेदनासाठी शासकीय वैद्यकीय महाविद्यालयात पाठवला आहे. मृत तरुणाची ओळख अद्याप पटलेली नाही. दरम्यान, तहसील प्रशासनाने नागरिकांना सतर्कतेचे आवाहन केले आहे. “सध्या जिल्ह्यातील पावसाचा जोर कायम असून नद्या, नाले, जलाशयांची पातळी वाढली आहे. नागरिकांनी कोणत्याही जलस्त्रोताजवळ जाऊ नये,” असे आवाहन तहसील प्रशासनाने केले आहे.
