नागपूर :- नागपूर शहराचा ऐतिहासिक वारसा जपणाऱ्या महाल भागात नागपूर महानगरपालिकेतर्फे उभारण्यात येत असलेल्या ‘श्रीमंत रघुजी राजे नगर भवन’ (टाऊन हॉल) च्या बांधकामाची महापौर निता ठाकरे यांनी आज मंगळवारी(ता.०५) प्रत्यक्ष पाहणी केली. या प्रकल्पाच्या कामाचा सविस्तर आढावा घेऊन, सर्व बांधकाम विहित कालबद्ध मर्यादेत पूर्ण करण्याचे निर्देश त्यांनी प्रशासनाला दिले आहेत.
पाहणी दरम्यान महापौरांनी “श्रीमंत राजे रघुजी भोसले यांच्या जीवनावर आधारित आणि नागपूरच्या ऐतिहासिक वैभवाचे दर्शन घडविणारे एक भव्य दालन या नगर भवनात उभारण्यात यावे,” अशी सूचना दिल्या.
यावेळी स्थायी समितीच्या सभापती शिवानी दाणी – वखरे, सत्ता पक्षनेते नरेंद्र (बाल्या) बोरकर, स्थापत्य व प्रकल्प विशेष समितीच्या सभापती अश्विनी जिचकार, महिला व बालकल्याण विशेष समिती सभापती सारिका नांदूरकर, नगरसेवक सुधीर राऊत, नगरसेवक सचिन नाईक यांच्यासह इतर नगरसेवक, मनपाच्या अधीक्षक अभियंता लिना उपाध्ये, कार्यकारी अभियंता अश्विनी येलचटवार, प्रकल्प अभियंता राजीव गौतम उपस्थित होते.
