नागपूर ४ : नागपूर जवळील बोरी गावातील देशी दारू दुकानावर बंदुकीचा धाक दाखवत जबरी चोरी करणाऱ्या चार दरोडेखोरांना वर्धा पोलिसांनी ‘सिनेस्टाईल’ पद्धतीने अटक केली. हा थरार सीसीटीव्हीत कैद झाला असून ही कारवाई शनिवार २ ऑगस्ट रोजी वर्ध्यातील मस्जिद चौकात सायंकाळी करण्यात आली. विशेष म्हणजे या गुन्ह्यातील आरोपींनी नागपूर ग्रामीण हद्दीतून गुन्हा करून वर्ध्यात पलायन केलं होतं आणि स्थानिक गुन्हे शाखेच्या दोन पथकांनी धाडसी कारवाई करत त्यांना ताब्यात घेतलं. या प्रकरणातील एक आरोपी अद्याप फरार असून, त्याचा शोध सुरू आहे.
घटना अशी घडली की, टाकळघाट येथील युगल वासाडे यांचे बोरी येथे देशी दारू विक्रीचे दुकान आहे. शनिवारी सायंकाळी एका लाल रंगाच्या स्विफ्ट कारमधून आलेल्या चार अनोळखी व्यक्तींनी त्यांच्या दुकानात शिरून बंदुकीचा धाक दाखवत गल्ल्यातील १५ हजार रुपये रोख रक्कम आणि त्यांचा आयफोन जबरदस्तीने हिसकावून घेतला. दरोडा टाकताच आरोपी कारमधून वर्धा दिशेने निघून गेले. युगल वासाडे यांनी याबाबतची तक्रार नागपूर ग्रामीण एमआयडीसी बोरी पोलीस ठाण्यात दिली. तक्रार दाखल होताच पोलिसांनी तत्काळ हालचाली सुरू केल्या.
पोलिस अधीक्षक अनुराग जैन यांच्या मार्गदर्शनाखाली स्थानिक गुन्हे शाखेचे निरीक्षक विनोद चौधरी यांच्या नेतृत्वाखाली पोलिस अंमलदार मनोज धात्रक, सचिन इंगोले, शेखर डोंगरे, अरविंद इंगोले, राहुल अधवाल, रितेश गेटमे या पथकांनी शोधमोहीम सुरू केली. या स्विफ्ट कारची माहिती घेतल्यानंतर ती रवींद्रसिंग ऊर्फ कालू (रा. गिरीपेठ, वर्धा) याच्या मालकीची असल्याचे निष्पन्न झाले. त्यावरून पोलिसांनी वर्धा परिसरात सापळा रचत मस्जिद चौक, महादेवपुरा येथे आरोपींचा पाठलाग केला.
आरोपी रवींद्रसिंग लखनसिंग (रा. कारला चौक, हनुमानगड, वर्धा), तुषार सहारे (रा. दुर्गा मंदिरजवळ, बुटीबोरी, नागपूर), नयन कडू (रा. संयोग कॉलनी, कारला रोड, पिपरी मेघे, वर्धा) आणि कुणाल हेमने (रा. सिंबायोसिस कॉलेजजवळ, खरबी, नागपूर) यांना ताब्यात घेण्यात आले. त्यांच्या ताब्यातून दोन देशी कट्टे, चार मोबाईल आणि ४० हजार रुपये रोख हस्तगत करण्यात आले. मात्र, यामध्ये सहभागी असलेला एक आरोपी फरार असून त्याचा शोध पोलीस घेत आहेत.
ही अटक नागपूर आणि वर्धा जिल्ह्यांतील पोलिस दलाच्या समन्वयातून करण्यात आली असून या आरोपींचा मागील अनेक गुन्ह्यांमध्ये सहभाग असल्याचा संशय व्यक्त करण्यात आला आहे. पोलिसांनी माहिती दिली की अटक आरोपी हे सराईत गुन्हेगार असून विविध लुटमारी, चोरी आणि धमकीच्या प्रकरणांमध्ये त्यांच्यावर आधीपासून गुन्हे दाखल आहेत. पोलिसांनी वापरलेल्या कारमुळे या गुन्ह्याचा छडा लावण्यात मोठी मदत झाली.
या घटनेनंतर नागपूर ग्रामीण आणि वर्धा जिल्ह्यात एकच खळबळ उडाली असून पोलिसांनी अतिशय तत्परतेने आणि सुसंघटितरीत्या ही कारवाई करून मोठा गुन्हा उघडकीस आणला आहे. अटक करण्यात आलेल्या आरोपींना पुढील कारवाईसाठी नागपूर ग्रामीण पोलिसांच्या ताब्यात देण्यात आले आहे. या प्रकरणाचा तपास सुरू असून लवकरच फरार आरोपीलाही अटक होईल, असा विश्वास पोलिस अधीक्षक अनुराग जैन यांनी व्यक्त केला आहे.
ही घटना आणि त्यानंतरची पोलिस कारवाई ही नागपूर व वर्धा जिल्ह्यांसाठी एक मोठा यशस्वी धडा ठरली असून गुन्हेगारीवर नियंत्रण ठेवण्यासाठी पोलिस यंत्रणा किती सक्रिय आहे, याचे उदाहरण ठरले आहे. नागरीकांनी संशयास्पद हालचाली दिसल्यास तात्काळ पोलिसांना माहिती द्यावी, असे आवाहनही यानिमित्ताने पोलिसांकडून करण्यात आले आहे.