नागपूर :- सार्वजनिक सेवा आणि विद्यार्थी कल्याणाप्रती आपली बांधिलकी जपत, आपली बसने रविवारी 690 NEET परीक्षार्थींना त्यांच्या परीक्षा केंद्रांपर्यंत यशस्वीरित्या पोहोचविण्याची जबाबदारी पार पाडली.
देशातील सर्वात महत्त्वाच्या प्रवेश परीक्षांपैकी एक असलेल्या NEET परीक्षेसाठी विद्यार्थ्यांना मदत करण्याच्या उद्देशाने, आपली बसने शहरातील विविध ठिकाणांहून विशेष बस सेवा सुरू केल्या. विद्यार्थ्यांना परीक्षेच्या दिवशी प्रवासाची कोणतीही चिंता न करता सुरक्षित, आरामदायी आणि वेळेवर परीक्षा केंद्रांवर पोहोचता यावे यासाठी हा उपक्रम राबविण्यात आला होता.
या विशेष सेवांचे नियोजन पहिलेच करण्यात आले होते. शहरातील निश्चित केलेल्या ठिकाणांहून बस सेवा सुरू करण्यात आल्या आणि विद्यार्थ्यांना अहवाल देण्याच्या वेळेपूर्वीच 30 परीक्षा केंद्रांवर पोहोचविण्यात आले. या उपक्रमाच्या यशस्वी अंमलबजावणीसाठी परिवहन विभागाद्वारे आपली बस व चलो टीम, चालक, वाहक आणि संचालन विभागातील कर्मचाऱ्यांनी समन्वय साधत विद्यार्थ्यांना सर्वतोपरी सहकार्य केले.
सदर उपक्रम विद्यार्थी आणि पालकांकडून उत्स्फूर्त प्रतिसाद मिळविण्यात यशस्वी ठरला. परिवहन समितीच्या सभापती मंगला खेकरे यांच्या मार्गदर्शनाखाली आपली बसतर्फे ही मोफत प्रवास सेवा उपलब्ध करून देण्यात आली. त्यामुळे विद्यार्थ्यांच्या प्रवासासंबंधीच्या चिंता कमी झाल्या आणि त्यांना आत्मविश्वासाने व शांत मनाने परीक्षा देता आली.
यावेळी अधिकाऱ्यांनी सांगितले की, सार्वजनिक वाहतूक व्यवस्था ही शैक्षणिक संधी आणि सामाजिक कल्याणाला चालना देण्यासाठी महत्त्वाची भूमिका बजावते. या विशेष उपक्रमाच्या यशस्वी अंमलबजावणीमुळे नियमित प्रवासी सेवांबरोबरच नागरिकांच्या गरजांसाठी तत्पर राहण्याची आपली बसची बांधिलकी पुन्हा अधोरेखित झाली आहे.