– त्रिमूर्ती चौकात समता सैनिक दलाचे शिस्तबद्ध संचलन; भव्य रॅली व संविधान वाचनाने परिसर दुमदुमला
हंसराज, प्रतिनिधी भंडारा :- शहरातील त्रिमूर्ती चौक परिसरात १ जानेवारी रोजी ‘भीमा कोरेगाव शौर्य दिन’ अत्यंत उत्साह, शिस्त आणि स्वाभिमानाने साजरा करण्यात आला. समता सैनिक दल आणि इतर विविध सामाजिक संघटनांच्या वतीने आयोजित या सोहळ्यात १८१८ च्या ऐतिहासिक लढाईतील ५०० महार सैनिकांच्या अदम्य शौर्याला मानवंदना देण्यात आली. .
कार्यक्रमाची सुरुवात भारतीय संविधानाचे शिल्पकार भारतरत्न डॉ. बाबासाहेब आंबेडकर यांच्या प्रतिमेला पुष्पहार अर्पण करून करण्यात आली. या ऐतिहासिक दिनाचे औचित्य साधून समता सैनिक दलाच्या सैनिकांनी पांढऱ्या गणवेशात शिस्तबद्ध संचलन (मार्च पास्ट) केले. सैनिकांनी विजयस्तंभाच्या प्रतिकृतीला पुष्पहार अर्पण करून भीमा कोरेगावच्या शहिदांना मानवंदना दिली.
याप्रसंगी उपस्थितांना मार्गदर्शन करताना समता सैनिक दलाच्या प्रवक्त्यांनी भीमा कोरेगाव लढाईच्या इतिहासावर प्रकाश टाकला. ते म्हणाले की, “१ जानेवारी १८१८ चा विजय हा केवळ एका लष्करी तुकडीचा विजय नसून, तो मानवी हक्कांच्या संघर्षाचा आणि शतकानुशतके लादलेल्या विषमतेविरुद्धच्या स्वाभिमानाचा विजय आहे. ५०० महार सैनिकांनी पेशवाईच्या अफाट सैन्याविरुद्ध दिलेला हा लढा आजही आपल्याला अन्यायाविरुद्ध लढण्याची प्रेरणा देतो. ही शौर्यगाथा आणि डॉ. बाबासाहेबांनी दिलेला हा वारसा पुढे नेणे ही काळाची गरज आहे.”
शौर्य दिनानिमित्त सामूहिक ‘बुद्ध वंदना’ घेण्यात आली. त्यानंतर उपस्थित सर्व समाजबांधवांनी भारतीय संविधानाच्या उद्देशिकेचे (संविधान वाचन) सामुदायिक पठण केले. लोकशाहीची मूल्ये, समता, बंधुता आणि न्याय जपण्याची शपथ यावेळी सर्वांनी घेतली. याप्रसंगी शहरातून भव्य रॅली काढण्यात आली,
कार्यक्रमाच्या शेवटी उपस्थित सर्व नागरिक आणि सैनिकांसाठी ‘महाप्रसादा’चे आयोजन करण्यात आले होते. या सोहळ्याला समता सैनिक दलाचे सर्व पदाधिकारी, स्थानिक सामाजिक कार्यकर्ते आणि भंडारा जिल्ह्यातील नागरिक मोठ्या संख्येने उपस्थित होते. समता सैनिक दलाच्या चोख नियोजनामुळे आणि तरुणांच्या मोठ्या सहभागामुळे हा शौर्य दिन सोहळा अत्यंत यशस्वीरीत्या पार पडला.
