नागपूर २५ : विक्रम हे कारमध्ये बसले असताना रवींद्रने त्यांना आवाज दिला. त्याने विक्रम यांना पानठेल्याजवळ बोलावित तेथील मटका रोटीच्या हॉटेलमध्ये नेले. तेथील मडके विक्रम यांच्या डोक्यावर फोडून मारहाण केली ‘दिवसाच पित आहात का’ असे म्हटल्याने मारहाण करीत सिटबेल्टने गळा आवळून बिल्डरला ठार मारण्याचा प्रयत्न करण्यात आला. ही थरारक घटना बजाजनगर पोलिस ठाण्याच्या हद्दीतील बजाजनगर चौकातील पीव्हीके वाइन शॉप परिसरात घडली. विक्रम प्रकाशराव टाकळे (वय ४२, रा. पांडुरंग गावंडे ले-आउट, खामला), असे जखमी बिल्डरचे, तर रवींद्र उर्फ बंडू लाकूडकर (वय ५०, रा. बेसा, बेलतरोडी) असे गुन्हा दाखल करण्यात आलेल्या दलालाचे नाव आहे.प्राप्त माहितीनुसार, बुधवारी दुपारी बिल्डर विक्रम यांनी आईला डोळ्याच्या शस्त्रक्रियेसाठी हॉस्पिटलमध्ये दाखल केले. दरम्यान, दलाल रवींद्र याने त्यांच्या मोबाइलवर संपर्क साधला. शस्त्रक्रिया सुरू असल्याने विक्रम यांनी प्रतिसाद दिला नाही. काही वेळाने रवींद्रने पुन्हा त्यांच्याशी संपर्क साधून पीव्हीके वाइन शॉप परिसरातील हॉटेलमध्ये भेटायला बोलाविले. विक्रम हे कारने तेथे गेले असता त्यांना रवींद्र दिसला नाही. त्यांनी रवींद्रच्या मोबाइलवर संपर्क साधत ‘तुम्ही कुठे आहात’, अशी विचारणा केली. ‘मी बारमध्ये आहे’, असे रवींद्र हा विक्रम यांना म्हणाला. ‘तुम्ही दिवसाच दारू पित आहात का’ असे विक्रम त्याला म्हणाले असता ‘मी खिचडी खात आहे’ असे तो म्हणाला. तसेच ‘दिवसाच दारू पित आहात का’ अशी विचारणा केल्याने रवींद्र संतापला. तो तिथे आला.विक्रम हे कारमध्ये बसले असताना रवींद्रने त्यांना आवाज दिला. त्याने विक्रम यांना पानठेल्याजवळ बोलावित तेथील मटका रोटीच्या हॉटेलमध्ये नेले. तेथील मडके विक्रम यांच्या डोक्यावर फोडून मारहाण केली. त्यानंतर पानठेला चालकाला कैची मागितली. त्याने नकार दिला. परत मारहाण केली. त्यानंतर बळजबरीने त्यांना कारमध्ये बसविले. यादरम्यान विक्रम यांची सोनसाखळी व चष्मा कुठे तरी पडला. कारमध्ये बसल्यानंतर सिटबेल्टने रवींद्रने त्यांचा गळा आवळला.रवींद्र याने कार सुरू करीत समोर नेली व जोरदार ब्रेक दाबला. संधी साधून विक्रम हे कारमधून बाहेर निघाले असता परत रवींद्रने त्यांना मारहाण केली. संधी साधून विक्रम तेथून पळाले. त्यांनी मित्राला माहिती दिली. त्यानंतर मित्रासह विक्रम यांनी बजाजनगर पोलिस ठाणे गाठून तक्रार दिली. पोलिसांनी गुन्हा दाखल करून तपास सुरू केला आहे.
