– एकुण ३० लाख ३० हजार रुपयांचा मुद्देमाल ताब्यात; आरोपीवर गुन्हा दाखल
हंसराज,भंडारा करडी :- करडी पोलीस स्टेशनच्या हद्दीत अवैध रेती वाहतुकीवर पोलिसांनी मोठी कारवाई केली आहे. ‘ऑल आऊट ऑपरेशन’ दरम्यान देव्हाडा येथे संशयास्पदरित्या उभ्या असलेल्या एका टिप्परवर छापा टाकून पोलिसांनी ३० लाख ३० हजार रुपयांचा मुद्देमाल जप्त केला आहे. याप्रकरणी चालक तथा मालकावर गुन्हा नोंदवण्यात आला आहे.
जिल्हा पोलीस अधीक्षक नूरुल हसन यांच्या मार्गदर्शनाखाली करडी परिसरात ‘ऑल आऊट ऑपरेशन’ राबवले जात होते. यावेळी सपोनि नागलोत आणि पोलीस कर्मचारी मेश्राम हे ताफ्यासह देव्हाडा परिसरात गस्त घालत असताना, त्यांना रोडच्या कडेला एक अशोक लेलँड कंपनीचा टिप्पर (क्र. MH36 AA 2845) संशयास्पदरित्या उभा असलेला आढळला.
पोलिसांनी या वाहनाची तपासणी केली असता, त्यात कोणताही अधिकृत परवाना नसताना अवैध रित्या चोरटी रेती वाहतूक केली जात असल्याचे निष्पन्न झाले. या कारवाईत ३० लाख रुपये किमतीचा टिप्पर आणि ३० हजार रुपये किमतीची ५ ब्रास रेती असा एकूण ३० लाख ३० हजार रुपयांचा मुद्देमाल जप्त करण्यात आला आहे.
याप्रकरणी आरोपी चालक/मालक कैलाश हारगु निशाने (वय ३४ वर्षे, रा. नवेगाव, ता. तिरोडा, जि. गोंदिया) याच्याविरुद्ध करडी पोलीस स्टेशन येथे अप. क्र. १६६/२०२६ (दिलेल्या माहितीनुसार), कलम ३०३ (२) भारतीय न्याय संहिता (BNS) सहकलम ४७, ४८ महाराष्ट्र महसूल अधिनियम आणि कलम १५ पर्यावरण संरक्षण अधिनियमान्वये गुन्हा दाखल करण्यात आला आहे.
सदर कारवाई पोलीस अधीक्षक नूरुल हसन, अपर पोलीस अधीक्षक निलेश मोरे, सपोनि नागलोत यांच्या मार्गदर्शनाखाली पोलीस शिपाई मेश्राम व करडी पोलीस कर्मचाऱ्यांनी केली. या प्रकरणाचा पुढील तपास करडी पोलीस करीत आहेत.
