तुमसर :- शहरातील शासकीय उपजिल्हा रुग्णालयात उपचारासाठी येणाऱ्या रुग्णांना अनेक गैरसोयींचा सामना करावा लागत असल्याचे चित्र समोर आले आहे. डॉक्टरांकडे तपासणीसाठी जाणाऱ्या रुग्णांची मोठी गर्दी होत असून, पुरुष आणि महिला रुग्णांसाठी स्वतंत्र रांगेची व्यवस्था नसल्याने सर्वजण एकाच रांगेत उभे राहत असल्याचे दिसून येत आहे.
रुग्णालयात उपचारासाठी येणाऱ्या महिलांना स्वतंत्र रांग किंवा योग्य नियोजनाची सुविधा मिळावी, अशी अपेक्षा असताना प्रत्यक्षात पुरुष आणि महिला रुग्ण एकाच ठिकाणी गर्दी करताना दिसत आहेत. त्यामुळे विशेषतः महिला, ज्येष्ठ नागरिक आणि आजारी रुग्णांची गैरसोय होत असल्याची भावना नागरिकांमध्ये आहे.
रुग्णांशी वागणुकीबाबतही नाराजी
उपचारासाठी येणाऱ्या रुग्णांना आजारपणासोबतच गर्दी आणि व्यवस्थेचा सामना करावा लागत आहे. त्यातच रुग्णालयातील काही कर्मचारी व स्टाफकडून रुग्णांशी योग्य पद्धतीने संवाद साधला जात नसल्याच्या तक्रारी नागरिकांकडून होत आहेत. रुग्णांना आवश्यक मार्गदर्शन, सहकार्य आणि सौजन्यपूर्ण वागणूक मिळणे गरजेचे आहे.
शासकीय रुग्णालयात सर्वसामान्य नागरिक उपचारासाठी मोठ्या अपेक्षेने येतात. त्यामुळे रुग्णांना सन्मानपूर्वक वागणूक देणे आणि त्यांची गैरसोय होणार नाही, यासाठी योग्य नियोजन करणे ही रुग्णालय प्रशासनाची जबाबदारी आहे.
प्रशासनाने तातडीने लक्ष द्यावे
तुमसर उपजिल्हा रुग्णालय प्रशासनाने रुग्णांच्या गर्दीचे योग्य नियोजन करून पुरुष व महिलांसाठी आवश्यकतेनुसार स्वतंत्र रांग व्यवस्था करावी. तसेच रुग्णांना योग्य मार्गदर्शन मिळावे आणि रुग्णांशी सौजन्यपूर्ण वागणूक दिली जावी, यासाठी संबंधित कर्मचाऱ्यांना स्पष्ट सूचना द्याव्यात, अशी मागणी नागरिकांकडून होत आहे.
रुग्णालय प्रशासन या समस्येकडे गांभीर्याने पाहून रुग्णांची गैरसोय दूर करण्यासाठी ठोस उपाययोजना कधी करणार? असा सवाल आता नागरिकांकडून उपस्थित केला जात आहे.