खापा, वार्ताहर :- आगामी श्रीकृष्ण जन्मोत्सव, गणेशोत्सव, दुर्गोत्सव तसेच विविध धार्मिक सणांच्या पार्श्वभूमीवर कन्हान नदीकाठावरील लांबटपुरा घाटाकडे जाणाऱ्या रस्त्याची स्थानिक युवकांनी श्रमदानातून स्वच्छता केली. रस्त्यावर साचलेली माती, चिखल व घाण हटवून रस्ता स्वच्छ करण्यात आला.
लांबटपुरा घाटावर गौराई, घट तसेच विविध देवी-देवतांच्या मूर्तींच्या विसर्जनासाठी महिला, मुले, युवक-युवती व नागरिकांची मोठी गर्दी होत असते. मात्र, घाटाकडे जाणाऱ्या रस्त्यावर मोठ्या प्रमाणात माती व चिखल साचल्याने भाविकांसह वाहनचालकांना गैरसोयीचा सामना करावा लागत होता. पावसामुळे रस्ता निसरडा झाल्याने अपघाताचा धोकाही निर्माण झाला होता.
ही समस्या लक्षात घेऊन प्रशासनाच्या मदतीची प्रतीक्षा न करता स्थानिक युवकांनी सामाजिक बांधिलकीतून पुढाकार घेतला. युवकांनी श्रमदान करून रस्त्यावरील माती व चिखल हटविला. त्यामुळे घाटाकडे जाणारा मार्ग अधिक स्वच्छ व मोकळा झाला.
“युवकांच्या पुढाकारामुळे भाविकांना मोठा दिलासा”
स्वच्छता मोहिमेमुळे रस्त्यावरील चिखल व निसरडेपणा कमी झाल्याने पायी जाणाऱ्या भाविकांना मोठा दिलासा मिळाला आहे. तसेच रस्त्यावरील अडथळे दूर झाल्याने दुचाकी व चारचाकी वाहनांची वाहतूकही अधिक सुरळीत झाली आहे.
श्रीकृष्ण जन्मोत्सव व आगामी सण-उत्सवांच्या काळात घाटावर वाढणारी गर्दी लक्षात घेता युवकांच्या या उपक्रमामुळे भाविकांना स्वच्छ, सुरक्षित आणि सुकर मार्ग उपलब्ध झाला आहे. प्रशासनाची वाट न पाहता युवकांनी स्वतः पुढाकार घेऊन केलेल्या या कामातून ‘समस्या दिसताच पुढाकार घ्या’ असा सकारात्मक संदेश समाजासमोर ठेवला आहे.
टायगर ग्रुप सावनेर तालुका अध्यक्ष संदीप गिरपुंजे, नगरसेवक आशिष ढाले व नवनियुक्त युवक काँग्रेस खापा शहर अध्यक्ष मुकेश पावडे यांच्या मार्गदर्शनाखाली हा उपक्रम राबविण्यात आला. अमोल लांबट, आकाश हिवरकर, सुर्यकांत (गोलू) बारापात्रे, लोकेश हिवरकर, वंश लांबट, शिवम पारड़कर, प्रतिक हिवरकर, विलास सुरकार, जगदीश हिवरकर, आदी युवकांनी आणि नगरसेवक आशिष ढाले मित्रपरिवाराने स्वच्छता मोहिमेत सक्रिय सहभाग घेतला.
युवकांच्या या उपक्रमामुळे भाविकांची गैरसोय दूर होऊन घाटाकडे जाणारी वाहतूक अधिक सुरळीत झाली आहे. सामाजिक जबाबदारीची जाणीव ठेवून युवकांनी घेतलेल्या या स्वयंस्फूर्त पुढाकाराचे नागरिकांकडून कौतुक होत आहे.