– बैलजोडी चालकांचा सत्कार; विविध बक्षिसांचे वाटप
हंसराज,भंडारा मोहगाव देवी (मोहाडी,):- मोहाडी तालुक्यातील मोहगाव देवी येथे ग्रामपंचायतीच्या भव्य आवारात पारंपरिक बैलपोळा सण मोठ्या उत्साहात आणि थाटामाटात साजरा करण्यात आला. दरवर्षीप्रमाणे यंदाही शेतकऱ्यांच्या सर्जा-राजाची मनोभावे पूजा करून त्यांना पुरणपोळीचा नैवेद्य अर्पण करण्यात आला.
याप्रसंगी उपस्थित मान्यवरांच्या हस्ते बैलजोडी चालकांचा दुपट्टा व छत्री देऊन यथोचित सत्कार करण्यात आला. बैलपोळ्याच्या निमित्ताने विविध प्रकारच्या बक्षीसांचे आयोजन करण्यात आले होते; मान्यवरांच्या हस्ते विजेत्यांना बक्षीस वाटप करण्यात आले. त्यानंतर पारंपरिक पद्धतीने मशाल पेटवून, सर्व गावकऱ्यांच्या उत्स्फूर्त सहकार्याने पोळा सण मोठ्या उत्साहात साजरा झाला.
या कार्यक्रमाला प्रमुख पाहुणे व मान्यवर म्हणून विकास देवराव लेंडे (सीए), सरपंच सुधाकर रामटेके, उपसरपंच उमेद लेंडे, महेश लेंडे, पोलीस पाटील बाळबुधे , पत्रकार नरेंद्र शेंडे यांच्यासह सर्व ग्रामपंचायत सदस्य, विविध क्षेत्रांतील मान्यवर व ग्रामस्थ मोठ्या संख्येने उपस्थित होते.