वर्धा :- राज्यातील औद्योगिक क्षेत्राला नवी ऊर्जा देण्यासाठी आणि उद्योगांना विनाव्यत्यय, उच्च दर्जाचा व सुरक्षित वीजपुरवठा सुनिश्चित करण्यासाठी महावितरण प्रशासन कटिबद्ध आहे. याच धोरणाचा एक भाग म्हणून महावितरण वर्धा मंडळाच्या वतीने शुक्रवारी (दि. 25 सप्टेंबर) ‘स्वागत कक्ष’ समिती आणि स्थानिक उद्योजकांची बैठक पार पडली. महावितरण वर्धा मंडळाच्या अधीक्षक अभियंता स्मीता पारखी यांच्या प्रमुख उपस्थितीत व अध्यक्षतेखाली मंडळ कार्यालयात ही बैठक संपन्न झाली.
महाराष्ट्र शासनाच्या औद्योगिक धोरणास अनुसरून आयोजित या बैठकीचा मुख्य उद्देश महावितरण आणि स्थानिक उद्योग जगतामधील थेट संवाद अधिक दृढ करणे हा होता. या बैठकीमध्ये वर्धा, आर्वी आणि हिंगणघाट या तिन्ही विभागांतील प्रमुख वीज समस्या, तांत्रिक अडचणी, नवीन वीजजोडणीचे प्रलंबित अर्ज, पायाभूत सुविधांचा विस्तार आणि बिलिंगविषयक महत्त्वाच्या मुद्द्यांवर सविस्तर व सकारात्मक चर्चा करण्यात आली. महावितरणच्या अधिकाऱ्यांनी उद्योजकांच्या अडचणी प्रत्यक्ष समजून घेत त्यावर तातडीने आणि कायमस्वरूपी तोडगा काढण्याचे आश्वासन दिले.
या बैठकीस वर्धा, आर्वी आणि हिंगणघाट विभागांचे वरिष्ठ महावितरण अधिकारी, कार्यकारी अभियंते, तांत्रिक पथकांचे प्रतिनिधी तसेच जिल्ह्यातील प्रमुख औद्योगिक वसाहतींमधील उद्योजक, व्यावसायिक आणि विविध औद्योगिक संघटनांचे प्रतिनिधी मोठ्या संख्येने उपस्थित होते. उद्योगांना अखंडित वीज मिळाल्यास उत्पादनात वाढ होऊन स्थानिक पातळीवर रोजगाराच्या नवीन संधी उपलब्ध होतील, असा विश्वास याप्रसंगी व्यक्त करण्यात आला.
महावितरणने घेतलेल्या या उद्योगस्नेही आणि तत्पर भूमिकेचे उपस्थितांनी मनापासून कौतुक केले. वीजविषयक अडचणींचे अशा प्रकारे थेट संवादातून वेळेत निवारण होत असल्याने स्थानिक उद्योजकांनी समाधान व्यक्त केले असून महावितरणच्या या ग्राहककेंद्री पुढाकाराचे सर्व स्तरांतून जोरदार स्वागत केले जात आहे.
