दोन दिवसांत १४.५ लाख रुपयांचा ऐवज लंपास
नागपूर २२ : नागपूर शहरात चोरीच्या घटनांमध्ये सातत्याने वाढ होत असून, केवळ दोन दिवसांत चोरट्यांनी सुमारे १४.५ लाख रुपयांच्या वस्तू चोरल्या आहेत. वेगवेगळ्या पोलिस ठाण्यांच्या हद्दीतील बंद घरे आणि दुकाने यांना लक्ष्य करत चोरट्यांनी शहरात धुमाकूळ घातला आहे. यामुळे नागरिकांत भीतीचे वातावरण निर्माण झाले असून पोलिसांच्याही नाकी नऊ आले आहेत. अजनी, प्रतापनगर, सीताबर्डी आणि एमआयडीसी पोलिस ठाण्यांच्या हद्दीत ही प्रकरणे घडली आहेत. चोरीच्या या मालिकेतील पहिली घटना अजनी पोलिस ठाण्याच्या हद्दीतील श्रीनगर परिसरात घडली. तक्रारदार राजू शेषराव ऑटोन (५८) हे अकाउंटंट असून, १५ ऑगस्ट रोजी कुटुंबासह उज्जैन आणि ओंकारेश्वर दर्शनासाठी गेले होते. त्यांच्या अनुपस्थितीत अज्ञात चोरट्यांनी घराचे कुलूप तोडून १ लाख ७ हजार रुपयांचा माल चोरून नेला. ही घटना १९ ऑगस्ट रोजी उघडकीस आली. प्रतापनगर पोलिस ठाण्याच्या हद्दीत दोन चोऱ्यांची नोंद झाली आहे. पहिल्या प्रकरणात, एमएसईबीमध्ये कार्यरत असलेले अमित राजेंद्र तुरकर (३८) हे १७ ऑगस्ट रोजी पत्नीला भेटण्यासाठी छिंदवाडा गेले असता त्यांच्या घरातून चोरट्यांनी ५ लाख १५ हजार रुपयांचा ऐवज चोरून नेला. दुसऱ्या घटनेत, प्राची दलित चौधरी (२२) या वर्धा येथे गेल्यानंतर त्यांच्या सर्वेनगरमधील भाड्याच्या घरातून ४ लाख २० हजार रुपयांचा माल चोरीला गेला. सीताबर्डी पोलिस ठाण्याच्या हद्दीत, ‘राज घराणा’ या मोदी क्रमांक २ येथील साडी दुकानात १८ ऑगस्टच्या रात्री चोरट्यांनी छतावरून प्रवेश केला आणि काउंटरमधील २ लाख ८० हजार रुपयांची रोकड चोरून नेली. तसेच, एमआयडीसी पोलीस ठाण्याच्या क्षेत्रातील हिंगणा रोडवरील वायसीसी कॉलेजसमोरील सुयश अपार्टमेंटमध्ये राहणाऱ्या गणेश रमेश पंडित (२१) यांच्या भाड्याच्या खोलीत १९ ऑगस्ट रोजी सकाळी चोरट्यांनी उघड्या दारातून प्रवेश करून १.१६ लाख रुपयांचा ऐवज लंपास केला. या पाच वेगवेगळ्या चोऱ्यांमुळे पोलिस यंत्रणा हादरून गेली आहे. सर्व प्रकरणांमध्ये अज्ञात चोरांविरुद्ध गुन्हे दाखल करण्यात आले असून पुढील तपास सुरू आहे.
@filephoto