– दुष्काळाच्या छायेत असलेल्या शेतकऱ्याला दुहेरी फटका!
संदीप कांबळे,कामठी :- कामठी तालुक्यातील जाखेगाव-बोरगाव शिवारात वाघाने केलेल्या हल्ल्यात गाय आणि बैलाचा मृत्यू झाल्याची घटना समोर आली आहे. या घटनेमुळे संबंधित शेतकऱ्यांचे आर्थिक नुकसान झाले असून, परिसरातील शेतकरी आणि नागरिकांमध्ये भीतीचे वातावरण पसरले आहे. आधीच दुष्काळाच्या झळा सोसणाऱ्या शेतकऱ्यांसमोर पशुधनाच्या नुकसानीमुळे नवे संकट उभे ठाकले आहे.
प्राप्त माहितीनुसार, जाखेगाव व बोरगाव परिसरातील शेतशिवारात असलेल्या जगदीश उमराव आखरे यांच्या बैलावर आणि लटारू नथ्थू राऊत यांच्या गायीवर वाघाने हल्ला केला. या हल्ल्यात दोन्ही जनावरांचा मृत्यू झाला. घटनेची माहिती मिळताच गावातील लोकप्रतिनिधींनी घटनास्थळी धाव घेत संबंधित यंत्रणेशी संपर्क साधला. जाखेगावच्या सरपंच भारती सचिन भोयर, तंटामुक्ती समितीचे अध्यक्ष सचिन भोयर, उपसरपंच लता मानवटकर तसेच ग्रामपंचायतीच्या सदस्यांनी घटनास्थळी भेट देऊन संबंधित अधिकाऱ्यांना माहिती दिली. मृत जनावरांचा पंचनामा करण्यासाठी अधिकाऱ्यांना पाचारण करण्यात आले.
कामठी तालुक्यात दुष्काळी परिस्थितीमुळे शेतकरी आधीच आर्थिक अडचणींचा सामना करीत आहेत. पिकांचे नुकसान, शेतीचा वाढता खर्च आणि शासकीय मदतीची प्रतीक्षा अशा परिस्थितीत गाय-बैलांच्या मृत्यूमुळे संबंधित शेतकऱ्यांचे आर्थिक नुकसान अधिकच वाढले आहे. शेतीच्या कामांसह उपजीविकेसाठी महत्त्वाचे असलेले पशुधन गमावल्याने या कुटुंबांसमोर आर्थिक प्रश्न निर्माण झाला आहे.
वाघाच्या हल्ल्याच्या घटनेनंतर परिसरातील नागरिकांमध्ये चिंतेचे वातावरण आहे. वनविभागाने घटनास्थळाची पाहणी करून वाघाच्या हालचालींचा मागोवा घ्यावा, नागरिकांच्या सुरक्षिततेसाठी आवश्यक प्रतिबंधात्मक उपाययोजना कराव्यात आणि नुकसानग्रस्त शेतकऱ्यांना नियमानुसार भरपाई मिळवून देण्यासाठी तातडीने कार्यवाही करावी, अशी अपेक्षा व्यक्त होत आहे.
वन्यप्राण्यांच्या वाढत्या हालचालींच्या पार्श्वभूमीवर शेतशिवारात काम करणाऱ्या शेतकरी व शेतमजुरांच्या सुरक्षिततेचा प्रश्नही ऐरणीवर आला आहे. त्यामुळे संबंधित यंत्रणा या घटनेची कितपत गांभीर्याने दखल घेते आणि नुकसानग्रस्त शेतकऱ्यांना किती लवकर मदत मिळते, याकडे आता लक्ष लागले आहे.
