एक वाक्य एक ग्रंथ आयुष्ये फुलविती
जपू या वाचन प्रवृत्ती, जोपासू वाचन संस्कृती
लिहून गेले थोर शहाणे अनमोल गोष्टी
वाचनातून स्वानंद अन विचार समृद्धी
विपुल शब्दसंपदा, विस्तारे कल्पनाशक्ती
वाचन पठणाने वाणी-भाषा सुधारती… जपू या…
ताणातून सुटका, आत्मविश्वासात वृद्धी
पुस्तकातून ज्ञान अन ज्ञानातून संपत्ती
उदात्त अनुभव साऱ्या विश्वातून येती
मशागत बुद्धीची, त्यातून नवनिर्मिती… जपू या..
होऊन पुस्तक-मित्र करू वाचकांची स्तुती
धाकट्यास प्रेरणा थोरले पारायण करती
सुशिक्षित खरा जो लावी वाचनाची गोडी
सक्षम समाजास्तव ग्रंथची भेट देती… जपू या…