– ११ हजारांवर सहाय्यक लोको पायलटच्या जागांची भरती!
जळगाव :- देशातील तरुणांसाठी रोजगाराची संधी निर्माण करण्याकरीता रेल्वे भरती बोर्डाकडून (आरआरबी) सहाय्यक लोको पायलट पदासाठी तब्बल ११,१२७ जागांची भरती जाहीर करण्यात आली आहे. विशेष म्हणजे केवळ दहावी उत्तीर्ण उमेदवारांनाही या प्रक्रियेत सहभागी होता येणार असल्याने ग्रामीण भागातील अल्पशिक्षित तरुणांसाठी ही सुवर्णसंधी मानली जात आहे. यासाठी १५ मे २०२६ पासून ऑनलाइन अर्ज प्रक्रिया सुरू होणार आहे.
सहाय्यक लोको पायलट हे पद रेल्वेच्या दैनंदिन कामकाजात अत्यंत महत्त्वाचे मानले जाते. इंजिन चालकाला सहाय्य करणे, सिग्नल व तांत्रिक बाबींवर लक्ष ठेवणे, तसेच सुरक्षित आणि वेळेवर रेल्वे धावण्यास मदत करणे ही या पदाची प्रमुख जबाबदारी असते. या पदासाठी निवड झालेल्या उमेदवारांना प्रारंभी १९,९०० रुपये मूलभूत वेतन दिले जाऊ शकते. याशिवाय महागाई भत्ता, घरभाडे भत्ता, प्रवास सवलती, वैद्यकीय सुविधा आणि इतर अनेक शासकीय लाभ मिळणार आहेत. सेवेत अनुभव वाढत गेल्यानंतर वेतनात टप्प्याटप्प्याने वाढ होण्याची संधीही उपलब्ध आहे. अर्ज करण्याची अंतिम मुदत १४ जून २०२६ आणि वयोमर्यादा १८ ते ३० वर्षे निश्चित करण्यात आली आहे. अनुसूचित जाती, अनुसूचित जमाती, इतर मागासवर्गीय, दिव्यांग तसेच महिला उमेदवारांना शासन नियमांनुसार वयोमर्यादेत सवलत दिली जाणार आहे.
अर्ज कसा आणि कुठे करावा?
सहाय्यक लोको पायलटच्या भरतीसाठी शैक्षणिक पात्रतेच्या अटीनुसार दहावी उत्तीर्ण असणे आवश्यक असले, तरी संबंधित तांत्रिक पदांसाठी आयटीआय किंवा समकक्ष तांत्रिक पात्रता बंधनकारक आहे. उमेदवारांनी अर्ज करण्यापूर्वी अधिकृत अधिसूचना काळजीपूर्वक वाचून सर्व अटी-शर्ती समजून घेणे आवश्यक असल्याचेही स्पष्ट करण्यात आले आहे. अर्ज प्रक्रिया पूर्णपणे ऑनलाइन पद्धतीने पार पडणार असल्याने उमेदवारांनी भारतीय रेल्वेच्या indianrailways.gov.in या अधिकृत संकेतस्थळावर जाऊन अर्ज सादर करायचा आहे. अर्ज करताना आवश्यक कागदपत्रे जसे की शैक्षणिक प्रमाणपत्रे, ओळखपत्र, फोटो व स्वाक्षरी योग्य स्वरूपात अपलोड करणे आवश्यक आहे. कोणतीही माहिती चुकीची किंवा अपूर्ण आढळल्यास अर्ज फेटाळला जाऊ शकतो, असा इशारा देण्यात आला आहे.
अशी असेल भरती प्रक्रिया
अर्ज शुल्क खुल्या व इतर मागास प्रवर्गासाठी ५०० रुपये ठेवण्यात आले आहे. तर अनुसूचित जाती, अनुसूचित जमाती आणि महिलांसाठी २५० रुपये शुल्क आकारले जाणार आहे. शुल्क ऑनलाइन माध्यमातून भरावे लागणार आहे. अर्ज सादर केल्यानंतर त्याची प्रिंट घेऊन ठेवणे आवश्यक आहे, जे पुढील प्रक्रियेसाठी उपयुक्त ठरणार आहे. भरती प्रक्रिया टप्प्याटप्प्याने पार पडणार असून त्यात संगणक आधारित परीक्षा, तांत्रिक चाचणी, कागदपत्र पडताळणी आणि वैद्यकीय तपासणीचा समावेश असणार आहे. परीक्षा अत्यंत स्पर्धात्मक असणार असल्याने उमेदवारांनी नियोजनबद्ध तयारी करणे आवश्यक आहे. गणित, सामान्य ज्ञान, तांत्रिक विषय आणि तार्किक विचारसरणी या विषयांवर विशेष भर देणे फायदेशीर ठरणार आहे. तज्ज्ञांच्या मते, नियमित सरावासह मागील प्रश्नपत्रिकांचे विश्लेषण आणि वेळेचे योग्य नियोजन केल्यास यश मिळण्याची शक्यता वाढते.
