– ललित बाळबुध्दे यांच्या नेतृत्वाखाली शेतकऱ्यांची एकजूट; बोनस, प्रोत्साहन राशी, ई-पिक पाहणी, धान खरेदी केंद्रे व वीज कनेक्शनच्या प्रश्नांवर चर्चा
पंकज परशुरामकर, प्रतिनिधी नवेगाव बांध :- धान उत्पादक शेतकऱ्यांच्या विविध प्रश्नांना वाचा फोडण्यासाठी तसेच शेतकऱ्यांच्या न्याय्य हक्कांसाठी संघटितपणे लढा उभारण्याच्या उद्देशाने पिंपळगाव/खांबी येथे रविवार, दि. ३० ऑगस्ट रोजी ‘अन्नदाता धान उत्पादक शेतकरी संघटने’च्या शाखेची स्थापना करण्यात आली. संघटनेचे अध्यक्ष ललित बाळबुध्दे यांच्या नेतृत्वाखाली झालेल्या या उपक्रमाला गावातील धान उत्पादक शेतकऱ्यांचा उत्स्फूर्त प्रतिसाद मिळाला. यावेळी आगामी हंगामाच्या पार्श्वभूमीवर शेतकऱ्यांच्या विविध प्रश्नांवर सविस्तर चर्चा करण्यात आली. विशेषतः ई-पिक पाहणी, धानाचा बोनस, प्रोत्साहन राशी, आधारभूत दराने धान खरेदी केंद्रे सुरू होणे तसेच शेतकऱ्यांना विद्युत कनेक्शन मिळणे या महत्त्वाच्या विषयांवर उपस्थित शेतकऱ्यांनी आपली मते मांडली. आगामी हंगामात होणारी ई-पिक पाहणी शेतकऱ्यांसाठी सुलभ व्हावी, त्याबाबत योग्य मार्गदर्शन व जनजागृती व्हावी, यासाठी संघटनेच्या माध्यमातून पाठपुरावा करण्याची भूमिका यावेळी घेण्यात आली. त्याचबरोबर धान उत्पादक शेतकऱ्यांना मिळणारा बोनस व प्रोत्साहन निधी वेळेत मिळावा, यासाठी शासन व प्रशासनाकडे संघटितपणे मागणी करण्याचे ठरविण्यात आले. धान खरेदीचा हंगाम सुरू होण्यापूर्वीच आधारभूत धान खरेदी केंद्रे सुरू करावीत, शेतकऱ्यांच्या धानाची वेळेत खरेदी व्हावी आणि त्यांना योग्य मोबदला मिळावा, याबाबतही चर्चा करण्यात आली. शेतीसाठी अत्यावश्यक असलेल्या विद्युत कनेक्शनचा प्रश्न देखील बैठकीत चर्चेला आला असून पात्र शेतकऱ्यांना वीज जोडणी मिळण्यासाठी संबंधित विभागाकडे संघटनेच्या माध्यमातून पाठपुरावा करण्याचा निर्धार व्यक्त करण्यात आला. शेतकऱ्यांचे प्रश्न सोडविण्यासाठी केवळ मागण्या न करता गावागावांत शेतकऱ्यांची संघटित ताकद उभी करण्याचा निर्धार यावेळी करण्यात आला. ‘अन्नदाता धान उत्पादक शेतकरी संघटना’ ही शेतकऱ्यांच्या हक्कांसाठी लोकशाही मार्गाने संघर्ष करणारी संघटना म्हणून आगामी काळात विविध प्रश्नांवर ठामपणे आवाज उठविणार असल्याचे यावेळी स्पष्ट करण्यात आले. पिंपळगाव/खांबी येथे शाखेची स्थापना झाल्याने परिसरातील धान उत्पादक शेतकऱ्यांना आपल्या प्रश्नांसाठी एक संघटित व्यासपीठ उपलब्ध झाले आहे. कार्यक्रमास उपस्थित सर्व मान्यवरांचे तसेच गावातील सर्व धान उत्पादक शेतकऱ्यांचे संघटनेच्या वतीने आभार मानण्यात आले असून पुढील शेतकरी लढ्यासाठी सर्व धान उत्पादक शेतकऱ्यांचे स्वागत करण्यात आले.
शेतकऱ्यांच्या प्रमुख मागण्या
ई-पिक पाहणी सुलभ करा | धानाचा बोनस वेळेत द्या | प्रोत्साहन राशी मिळू द्या | आधारभूत धान खरेदी केंद्रे वेळेत सुरू करा | पात्र शेतकऱ्यांना विद्युत कनेक्शन द्या | शेतकरी प्रश्नांसाठी संघटित लढा उभारा
शेतकरी प्रतिक्रिया
“धान उत्पादक शेतकऱ्यांच्या प्रश्नांसाठी आता गावागावांतून संघटित आवाज उठविण्याची गरज आहे. बोनस, प्रोत्साहन राशी, धान खरेदी केंद्रे, ई-पिक पाहणी आणि शेतीच्या वीज कनेक्शनसारखे प्रश्न शेतकऱ्यांच्या दैनंदिन जीवनाशी जोडलेले आहेत. पिंपळगाव-खांबी येथे संघटनेची शाखा स्थापन झाल्याने शेतकऱ्यांना आपल्या हक्कांसाठी एकजुटीने लढण्याचे व्यासपीठ मिळाले आहे.”