मुंबई, दि. १९ : मानखुर्द (पश्चिम) ते ट्रॉम्बे परिसरातील ३१० मीटर लांबीच्या नाल्याचे रुंदीकरण पूर्ण झाले आहे. झोपड्या असलेल्या ठिकाणी १३५२ मीटर लांबीच्या नाल्याचे रुंदीकरण करण्यात येणार आहे. या नाला रुंदीकरणात बाधित झोपडीधारकांचे पुनर्वसन करण्यात येईल, असे नगरविकास राज्यमंत्री माधुरी मिसाळ यांनी विधानसभेत लक्षवेधी सूचनेच्या उत्तरात सांगितले.
याबाबत सदस्य अमित साटम यांनी लक्षवेधी सूचना उपस्थित केली होती.
नगरविकास राज्यमंत्री मिसाळ म्हणाल्या, या रुंदीकरणामधील झोपड्यांचे निष्कासन व नाला रुंदीकरण दोन टप्प्यात करण्याची कार्यवाही सुरू आहे. एकूण ११४० झोपड्यांपैकी २५० झोपड्यांचे सुधारित अंतिम परिशिष्ट २ प्रदर्शित करण्यात आले आहे. यामधील पात्र ४४ झोपडीधारकांना पर्यायी सदनिका उपलब्ध करून देण्यात आल्या आहेत.
उर्वरित झोपडीधारकांचे परिशिष्ट २ तयार करण्याची कार्यवाही सुरू आहे. महापालिकेस प्राप्त तक्रारीच्या अनुषंगाने चौकशी करण्यात येत असून अहवालानंतर संबंधितांवर कारवाई करण्यात येईल, असेही नगरविकास राज्यमंत्री मिसाळ यांनी सांगितले.