भंडारा १२ : साकोली येथील ऐतिहासिक मामा तलावाची पार १ ऑगस्ट रोजी अचानक तुटल्याने परिसरातील शेतकरी आणि मच्छिमारांचे मोठे नुकसान झाले आहे. या घटनेनंतर आमदार डॉ. परिणय फुके यांनी घटनास्थळी भेट देऊन पाहणी केली. त्यांनी मामा तलावाच्या पुनर्बांधणीसाठी तात्काळ प्रस्ताव तयार करण्याचे निर्देश अधिकाऱ्यांना दिले आहेत.
आमदार फुके यांनी तुटलेल्या तलावाची पाहणी केली आणि त्यानंतर प्रभावित झालेल्या शेतकरी व मच्छिमारांशी संवाद साधला. त्यांनी ४.५ कोटी रुपयांचा निधी मंजूर करून घेण्यासाठी आणि तलावाची सिंचन क्षमता वाढवण्यासाठी ५० हजार ब्रास गाळ काढण्याचा प्रस्ताव तयार करण्याचे आदेश दिले. प्रशासनाला लवकरच पंचनामा करून शेतकऱ्यांना तातडीने आर्थिक मदत देण्याचे निर्देशही त्यांनी दिले.
यावेळी त्यांनी सांगितले की, सरकार शेतकऱ्यांच्या पाठीशी ठामपणे उभे आहे आणि त्यांना शक्य ती सर्व मदत केली जाईल. या पुनर्रचना कामामुळे परिसरातील जलसंकट दूर होईल आणि खालील शेतीत पाण्याचा पुरवठा सुरळीत होईल.
याप्रसंगी आयोजित बैठकीत जिल्हाधिकारी संजय कोलते, उपविभागीय अधिकारी स्वाती देसाई आणि तहसीलदार निलेश कदम उपस्थित होते. बैठकीत माजी नगरसेवक मनीष कापगते यांनी तलावाच्या पार, सांडवा, पाचही गेट आणि कालव्यांची तात्काळ दुरुस्ती करण्याची मागणी केली. तसेच, तुटलेल्या रस्त्याची उंची वाढवून दुरुस्ती करण्याची आणि प्रभावित शेतकऱ्यांना पुरेसे आर्थिक साहाय्य देण्याची मागणीही त्यांनी केली.
या पुनर्रचना प्रकल्पामुळे साकोलीतील पाण्याची समस्या दूर होईल आणि परिसरातील शेती अधिक सुपीक होण्यास मदत मिळेल, अशी आशा व्यक्त केली जात आहे.