कामठी नागपूर :- सामाजिक कार्य महाविद्यालय, कांपटी येथील आयक्यूएसी (IQAC) व अंतर्गत तक्रार समिती (ICC) विभागाच्या वतीने तसेच एडुसन फाउंडेशन यांच्या सहकार्याने “महिला व मुलींची सुरक्षितता, हक्क आणि कायदेशीर सक्षमीकरण” या विषयावर १५ डिसेंबर रोजी महाविद्यालयाच्या प्रांगणात एक दिवसीय परिसंवाद यशस्वीरित्या पार पडला. या परिसंवादाचा मुख्य उद्देश महिलांचे हक्क, बाल संरक्षण कायदे, तसेच कायदेशीर सक्षमीकरणा बाबत जनजागृती करणे आणि सामाजिक कार्याच्या विद्यार्थ्यांमध्ये वकिली, कायदेशीर साक्षरता व समुदायस्तरीय हस्तक्षेप यांची भूमिका अधिक बळकट करणे हा होता. कार्यक्रमाची सुरुवात थोर समाजसुधारिका क्रांतिज्योती सावित्रीबाई फुले यांच्या प्रतिमेचे पूजन करून करण्यात आली. प्रास्ताविक भाषणात डॉ. निलेश काळे यांनी परिसंवादाची उद्दिष्टे व सामाजिक कार्य शिक्षणातील त्याचे महत्त्व विशद केले. संपूर्ण कार्यक्रमाचे प्रभावी सूत्रसंचालन उज्ज्वला सुखदेव यांनी केले. महाविद्यालयाच्या प्राचार्या डॉ. रुबीना अन्सारी यांनी प्रमुख पाहुण्या म्हणून उपस्थित राहून मुख्य भाषण केले. त्यांनी सामाजिक कार्य क्षेत्रातील व्यावसायिकांसाठी कायदेशीर जागरूकतेचे महत्त्व अधोरेखित केले तसेच विद्यार्थ्यांना समुदायाधारित कायदेशीर व संरक्षणात्मक उपक्रमांमध्ये सक्रिय सहभाग घेण्याचे आवाहन केले. यावेळी प्रा. राम बुटके व प्रा. अवेक्षणी शेख यांनीही उपस्थित राहून मार्गदर्शन केले. या परिसंवादात विविध क्षेत्रातील मान्यवर तज्ज्ञांनी मार्गदर्शन केले. सौ. मंजुषा रहाणे, जिल्हा संरक्षण अधिकारी यांनी महिलांच्या सक्षमीकरणाशी संबंधित कायद्यांवर सविस्तर माहिती दिली. मुश्ताक पठाण, बाल संरक्षण अधिकारी व प्रमुख यांनी पोक्सो कायदा, किशोर न्याय अधिनियम व बालविवाह प्रतिबंधक कायदा यांची माहिती प्रत्यक्ष प्रकरणांच्या उदाहरणांसह स्पष्ट केली. यशोमती ठोंबरे, समुपदेशक, वन स्टॉप सेंटर यांनी महिलांच्या सुरक्षितता व सक्षमीकरणात वन स्टॉप सेंटरची भूमिका अधोरेखित केली. तसेच राहुल साबळे, सहाय्यक पोलीस निरीक्षक, नवी कामठी पोलीस स्टेशन यांनी ऑपरेशन थंडर, कायदेशीर जनजागृती व प्रतिबंधात्मक उपाययोजनांवर सखोल मार्गदर्शन केले. डॉ. निशांत माटे, प्राध्यापक व आयक्यूएसी प्रमुख यांनी समाज कार्य शिक्षणात अशा परिसंवादांचे शैक्षणिक महत्त्व स्पष्ट केले. परिसंवादास विद्यार्थ्यांचा उत्स्फूर्त प्रतिसाद लाभला. प्रश्नोत्तर सत्रात विद्यार्थ्यांनी विविध कायदेशीर व क्षेत्रीय वास्तवांबाबत प्रश्न विचारले, ज्यामुळे त्यांना प्रत्यक्ष अनुभवाधारित ज्ञान मिळाले. कार्यक्रमाचा समारोप राहुल जूनघरे यांच्या आभार प्रदर्शनाने झाला. त्यांनी प्रमुख पाहुणे, सर्व मान्यवर वक्ते, एडुसन फाउंडेशन, प्राध्यापकवर्ग, आयोजक व विद्यार्थ्यांचे मनःपूर्वक आभार मानले. हा परिसंवाद सामाजिक कार्याच्या व्यवहाराशी कायदेशीर ज्ञानाचे एकत्रीकरण करणारा ठरला असून, महिला व मुलींच्या सुरक्षितता, हक्क आणि सक्षमीकरणाबाबतची सामूहिक बांधिलकी अधिक दृढ करणारा ठरला.