नागपूर :- महाराष्ट्र राज्य जलतरण संघटनेच्या मान्यतेने जळगाव येथील छत्रपती शिवाजी महाराज क्रीडा संकुलात 3 आणि 4 ऑक्टोबर रोजी आयोजित करण्यात आलेल्या 27 व्या राज्यस्तरीय मास्टर स्विमिंग चॅम्पियनशिप स्पर्धेत महावितरणचे अधिकारी श्रीपाद काळे यांनी आपल्या अद्भूत व देदीप्यमान क्रीडा कौशल्याच्या जोरावर यशोशिखर गाठले आहे. संपूर्ण महाराष्ट्रातील विविध जिल्ह्यांतून आलेल्या शेकडो नामांकित व कसलेल्या जलतरणपटूंना मागे टाकत त्यांनी स्पर्धेतील आपल्या सर्वच्या सर्व चारही आव्हानात्मक प्रकारांमध्ये सुवर्णपदके जिंकून ‘ऑलओव्हर चॅम्पियन ऑफ द टूर्नामेंट’ हा सर्वोच्च बहुमान पटकावला. श्रीपाद काळे हे महावितरणच्या बुटीबोरी शहर शाखेचे सहायक अभियंता म्हणून कार्यरत आहेत.
श्रीपाद काळे हे अभियंता असले तरी, खेळाच्या मैदानावर त्यांची कामगिरी एखाद्या व्यावसायिक जलतरणपटूसारखीच प्रभावी असते. आपली शासकीय जबाबदारी समर्थपणे पार पाडत असतानाच, स्वतःच्या आवडीच्या क्षेत्रात सातत्याने सराव करून त्यांनी हे यश मिळवले आहे. केवळ या महोत्सवापुरतेच नव्हे, तर ‘मास्टर्स’ वयोगटातील जलतरण स्पर्धांमध्ये त्यांनी दीर्घकाळापासून आपला दबदबा कायम ठेवला आहे. त्यांच्या याच सातत्याचे फळ म्हणून त्यांना हे यश मिळाले आहे.
या दोन दिवशीय राज्यस्तरीय क्रीडा कुंभमेळ्याचे शानदार उद्घाटन राज्याचे पाणीपुरवठा व स्वच्छता मंत्री गुलाबराव पाटील यांच्या शुभहस्ते आणि क्रीडा जगतातील मान्यवरांच्या प्रमुख उपस्थितीत अत्यंत उत्साही वातावरणात पार पडले. स्पर्धेच्या पहिल्या दिवसापासूनच श्रीपाद काळे यांनी जलतरण तलावात आपल्या उत्कृष्ट तंत्र, वेगाचे अचूक गणित आणि जबरदस्त स्टॅमिनाचा परिचय देत एकतर्फी वर्चस्व कायम राखले. त्यांनी 100 मीटर बॅकस्ट्रोक, 50 मीटर बॅकस्ट्रोक, 200 मीटर फ्रीस्टाईल आणि 100 मीटर फ्रीस्टाईल या चारही स्पर्धा प्रकारांत प्रथम स्थान मिळवत तब्बल चार सुवर्णपदकांची मालिका रचली.
चारही प्रकारात मिळवलेल्या या निर्भेळ आणि ऐतिहासिक यशाबद्दल त्यांना मंत्री गुलाबराव पाटील आणि जलतरण संघटनेच्या पदाधिकऱ्यांच्या हस्ते स्पर्धेची मुख्य ‘ऑलओव्हर चॅम्पियनशिप ट्रॉफी’ प्रदान करून विशेष सन्मानित करण्यात आले. महावितरणमध्ये सेवा बजावतानाच अत्यंत शिस्तबद्ध सराव आणि अखंड जिद्दीच्या जोरावर श्रीपाद काळे यांनी मिळवलेल्या या यशाचे क्रीडा क्षेत्रासह सर्वत्र कौतुक होत आहे. त्यांच्या या राज्यस्तरीय यशाबद्दल महावितरणच्या नागपूर परिमंडळाचे मुख्य अभियंता राजेश नाईक, नागपूर शहर मंडळाचे अधीक्षक अभियंता प्रफुल लांडे, बुटीबोरी विभागाचे कार्यकारी अभियंता प्रशांत टेंभेकर यांच्यासह महावितरणचे सर्व अधिकारी, कर्मचारी, मित्रपरिवार आणि क्रीडाप्रेमींकडून श्रीपाद काळे यांच्यावर अभिनंदनाचा आणि कौतुकाचा वर्षाव होत आहे.
