किशोर साहू, मौदा :- जिल्हा परिषद प्राथमिक शाळा, तोंडली येथील विद्यार्थ्यांची शैक्षणिक क्षेत्रभेट व वनभोजनाचा उपक्रम नुकताच घिवारी मंदिर परिसरात उत्साहात पार पडला. या उपक्रमातून विद्यार्थ्यांनी निसर्गाच्या सान्निध्यात अनुभवाधारित शिक्षणाचा आनंद घेतला.
क्षेत्रभेटीदरम्यान विद्यार्थ्यांनी घिवारी मंदिराचे धार्मिक व ऐतिहासिक महत्त्व जाणून घेतले. मंदिरातील पुजाऱ्यांकडून विद्यार्थ्यांनी मुलाखत घेतली तसेच भक्तांकडून मंदिराविषयीची सविस्तर माहिती मिळवली. या माध्यमातून विद्यार्थ्यांच्या संवादकौशल्याला व निरीक्षण क्षमतेला चालना मिळाली.
शाळेच्या मुख्याध्यापिका अनुराधा धुर्डे तसेच सहशिक्षक निलेश जाधव हे विद्यार्थ्यांमध्ये चिकित्सक विचार, सर्जनशीलता व समस्या निराकरण यांसारखी कौशल्ये विकसित करण्यासाठी असे उपक्रम सातत्याने राबवत असल्याचे यावेळी सांगण्यात आले.
या उपक्रमाच्या यशस्वी आयोजनासाठी शाळेच्या स्वयंपाकी अनिता धांडे तसेच पालक वर्गातून निशा कातोरे, ललिता कातोरे व कार्तिक ठाकरे यांचे मोलाचे सहकार्य लाभले. शिक्षक, पालक व शाळा व्यवस्थापन समितीच्या संयुक्त प्रयत्नातून हा उपक्रम यशस्वीरीत्या पार पडला.
अशा प्रकारच्या उपक्रमांमुळे विद्यार्थ्यांचे अनुभवाधारित शिक्षण समृद्ध होत असून त्यांचा सर्वांगीण विकास होत असल्याचे मत उपस्थितांनी व्यक्त केले.