-‘उत्तम नर्सरीचे नियोजन व सुधारित धोरण’ या संदर्भात घेतला आढावा
नागपूर :- संत्रा ही विदर्भाची शान असून त्याचा दर्जा अधिक चांगला करून जागतिक बाजारपेठेत निर्यातयोग्य बनवण्यासाठी नर्सरी सक्षम करणे आवश्यक आहे. या दृष्टीने राज्य आणि केंद्र शासनाच्या कृषी धोरणात आवश्यक सुधारणा करण्यासाठी लवकरच महाराष्ट्राचे मुख्यमंत्री देवेंद्र फडणवीस आणि केंद्रीय कृषी व फलोत्पादन मंत्री शिवराजसिंग चौहान यांच्याशी चर्चा करणार असल्याची माहिती केंद्रीय रस्ते वाहतूक व महामार्ग मंत्री ना. नितीन गडकरी यांनी दिली.
‘उत्तम नर्सरीचे नियोजन आणि संत्रा उत्पादकांसाठी सुधारित धोरण’ या विषयावर आयोजित बैठकीत गडकरी बोलत होते. यावेळी ना. गडकरी यांनी स्पष्ट केले की, संत्र्याचे उत्पादन आणि गुणवत्ता वाढवायची असेल, तर रोगमुक्त व उच्च प्रतीच्या कलमांची नर्सरी शेतकऱ्यांपर्यंत पोहोचवणे यासाठी गांभीर्याने प्रयत्न होणे आवश्यक आहे. सरकार, कृषी विद्यापीठ आणि राष्ट्रीय लिंबू वर्गीय फळ संशोधन संस्था यांनी कार्यपद्धती निश्चित करावी. ना. गडकरी म्हणाले, “स्पेन व इजरायलमध्ये पाहिलेले फलोत्पादनातील आधुनिक तंत्रज्ञान व नर्सरी व्यवस्थापन आपणही आत्मसात केले पाहिजे. यामुळे उत्पादन व उत्पन्न दोन्ही वाढेल.” ते पुढे म्हणाले की, राज्यातील विद्यमान नर्सरी कायद्यात सुधारणा करून दर्जेदार आणि रोगमुक्त रोपवाटिका उभारण्यासाठी धोरण तयार केले जावे असा आग्रह राज्य आणि केद्र सरकारकडे धरणार आहे.
या बैठकीस ज्येष्ठ कृषी तज्ज्ञ डॉ. सी. डी. मायी, आंबा विषयातील तज्ज्ञ डॉ. भगवानराव कापसे, डॉ. पंजाबराव देशमुख कृषी विद्यापीठाचे अधिष्ठाता डॉ. पंचभाई, फळशास्त्र विभाग प्रमुख डॉ. शशांक भराड, जिल्हा कृषी अधीक्षक रविंद्र मनोहरे, राष्ट्रीय लिंबूवर्गीय संशोधन केंद्राचे डॉ. दास, महा ऑरेंजचे अध्यक्ष श्रीधरराव ठाकरे, अॅग्रोव्हिजनचे सुधीर दिवे, डॉ. प्रवीण भालेराव यांच्यासह नर्सरीधारक आणि संत्रा उत्पादक शेतकरी उपस्थित होते.
तज्ज्ञांकडून सखोल मार्गदर्शन
बैठकीत डॉ. शशांक भराड यांनी नर्सरी संचालनाच्या निकषांबाबत, आवश्यक गुंतवणूक, मातृवृक्ष बागेचे नियोजन, व संत्रा रोपे खरेदी करताना शेतकऱ्यांनी घ्यायची काळजी याबाबत सादरीकरण केले. डॉ. पंचभाई यांनी रूटस्टॉक व पारंपरिक नर्सरींच्या मर्यादा आणि रोगांविषयी माहिती दिली. जिल्हा कृषी अधीक्षक रवींद्र मनोहरे यांनी राज्यातील नर्सरी कायद्यावर सादरीकरण करताना सुचवण्यात आलेल्या सुधारणा स्पष्ट केल्या. डॉ. सी. डी. मायी यांनी कृषी विद्यापीठांनीदेखील दर्जेदार रोपवाटिकेची जबाबदारी घ्यावी, अशी सूचना केली.
संयुक्त धोरणासाठी पुढाकार
या विषयावर धोरणात्मक निर्णय घेण्यासाठी संत्रा उत्पादक, नर्सरीधारक, कृषी विद्यापीठ व शासनाच्या कृषी विभागाच्या संयुक्त बैठकीचे आयोजन करण्यात आले होते. सुधीर दिवे यांनी प्रास्ताविक केले. संत्रा उत्पादक शेतकऱ्यांसाठी हा निर्णय मैलाचा दगड ठरेल, असा विश्वास या बैठकीत व्यक्त करण्यात आला.