मुंबई : आयसीसी महिला वनडे वर्ल्ड कप २०२५ स्पर्धा सुरू आहे. ऑस्ट्रेलियाने उपांत्य फेरीत स्थान पक्के केले आहे तर भारतीय संघासाठी पुढची वाट अवघड असणार आहे. महिला भारतीय संघाने स्पर्धेमध्ये चारपैकी दोन सामने जिंकले तर दोन सामन्यात पराभवाचा सामना करावा लागला आहे. पॉइंट टेबलमध्ये भारतीय संघ चौथ्या स्थानावर आहे. या स्पर्धेमध्ये एक धक्कादायक घटना घडली आहे. खेळाडूला भर मैदानातून स्ट्रेचरवर घेऊन जावं लागलं.
नेमकं काय घडलं?
हा सामना कोलंबो येथील आर प्रेमदासा स्टेडियमवर खेळला जात होता. श्रीलंकेच्या डावातील पाचव्या षटकातील चौथ्या चेंडूवर ही घटना घडली. दक्षिण आफ्रिकेची गोलंदाज मरिजाने केप गोलंदाजी करत होती. विशमी गुणारत्नेने पुढे येऊन मिड-ऑनच्या दिशेने फटका मारला आणि एक धाव घेण्याचा प्रयत्न केला. यावेळी क्षेत्ररक्षकाने तिला धावबाद करण्याच्या प्रयत्नात चेंडू फेकला. मात्र, तो यष्टीला लागण्याऐवजी थेट विशमीच्या गुडघ्यावर लागला. यामुळे ती वेदनेने कळवळली आणि तिला मैदानाबाहेर न्यावे लागले. विशमी त्यावेळी १६ चेंडूंवर १२ धावांवर खेळत होती.
कोलंबो येथे दक्षिण आफ्रिकेविरुद्धच्या सामन्यादरम्यान श्रीलंकेची सलामीवीर विशमी गुणारत्ने चेंडू लागून जखमी झाली. टॉस जिंकून प्रथम फलंदाजी करणाऱ्या श्रीलंकेच्या डावात १२ षटकांनंतर पावसाने व्यत्यय आणला. विशमीला धाव घेताना चेंडू लागल्याने तिला स्ट्रेचरवरून मैदानाबाहेर न्यावे लागले. श्रीलंकेच्या महिला क्रिकेट संघाने विशमीच्या दुखापतीबद्दल अपडेट दिले आहे. सोशल मीडियावर पोस्ट करत त्यांनी सांगितले की, विशमी धाव घेण्याचा प्रयत्न करत असताना तिच्या डाव्या गुडघ्याला चेंडू लागला. ती वैद्यकीय पथकाच्या देखरेखेखाली असून तिला कोणतीही गंभीर दुखापत झालेली नाही. संघ व्यवस्थापनाने पुष्टी केली आहे की गुणारत्ने पुन्हा फलंदाजीसाठी येऊ शकेल. श्रीलंकेच्या महिला संघाने या वनडे वर्ल्ड कपमध्ये आतापर्यंत ४ सामने खेळले आहेत. यापैकी त्यांना २ सामन्यांमध्ये पराभव पत्करावा लागला आहे, तर २ सामने पावसामुळे रद्द झाले आहेत. गुणतालिकेत श्रीलंका २ गुणांसह सातव्या स्थानावर आहे. त्यांचा नेट रनरेट -१.५२६ आहे.
