एक सावित्री पुराणातली
तिने तारले सत्यवानाचे प्राण
तिच्याहूनही ज्ञानाई तू
आमच्यासाठी महान
साथ देऊन ज्योतिबांची
भरला जीवनी आनंद
तुझ्यासाठी ज्योतिबा जणू
कळीतील मकरंद
तू लढलीस म्हणून
जन्मा अमुच्या किंमत आली
झेलून शेण दगड माती
लाख अश्रूंची फुले केली
भुकेल्यांची भाकर झाली
अनाथांची माऊली
पोळल्या लेकी- सुनांस
दिली मायेची सावली
पाठी पोर बांधून
लढली झाशीची राणी
तुझ्या पाठी प्लेग रोगी
अमर तुझी बलिदान कहाणी
दुष्काळाचा डोंब उठला
जनी पाहावे ना दैना
अन्नछत्र चालविले
तू खरी अन्नपूर्णा
थोर तुझे कष्ट आणिक
थोर तुझे उपकार आई
अस्तित्वाचे भान दिले तू
सांग होऊ कशी उतराई
वात्सल्य ही थोर तुझे
जणू वासराची गाय
ज्योती झाला बाप अन्
सावित्री माझी माय
– माला पारधी नागपूर
