– जंगलातील नैसर्गिक वातावरणाचा जवळून अनुभव.
खापा, वार्ताहर :- बुद्ध पौर्णिमेच्या पवित्र दिवशी चंद्रमाच्या अंधाऱ्या प्रकाशात (दि.१ मे) शुक्रवार रोजी नागलवाडी वनपरिक्षेत्र, पेंच व्याघ्र प्रकल्प येथे ‘निसर्गानुभव २०२६’ कार्यक्रम यशस्वीरित्या आयोजित करण्यात आला. हा कार्यक्रम सायंकाळी दि. १ मे दुपारी ४ वाजता सुरू होऊन दि.२ मे सकाळी ८ वाजेपर्यंत, रात्रभर पार पडला. या कार्यक्रमाद्वारे निसर्गप्रेमींना जंगलातील रात्रकालीन वन्यजीव हालचालींचा प्रत्यक्ष अनुभव घेण्याची अनोखी संधी उपलब्ध करून देण्यात आली.
या कार्यक्रमासाठी नागलवाडी वनपरिक्षेत्रातील विविध वन्यजीव हालचालींच्या ठिकाणी एकूण २३ मचाण उभारण्यात आले होते. महाराष्ट्रातील विविध जिल्ह्यांमधून सहभागी झालेल्या निसर्गप्रेमींनी मोठ्या उत्साहाने या कार्यक्रमात सहभाग घेतला व जंगलातील नैसर्गिक वातावरणाचा जवळून अनुभव घेतला.
रात्रभर चाललेल्या या निरीक्षणादरम्यान जंगलातील वन्यजीवांची चांगली हालचाल आढळून आली. विशेष म्हणजे दोन मचाणांवर वाघाचे दर्शन झाले, ज्यामुळे सहभागींसाठी हा अनुभव अत्यंत रोमांचक व अविस्मरणीय ठरला. याशिवाय इतर अनेक मचाणांवर चितळ, सांबर, भारतीय गवा (गौर), रानडुक्कर तसेच इतर विविध वन्यप्राण्यांची नियमित हालचाल आढळून आली. एकूणच विविध मचाणांवरून सुमारे २०० वन्यजीव दर्शनांची नोंद करण्यात आली, ज्यातून नागलवाडी वनपरिक्षेत्रातील समृद्ध जैवविविधता व निरोगी वन्यजीव अधिवास स्पष्टपणे दिसून आला.
सहभागींनी मचाणावर बसून शांततेत रात्र व्यतीत करताना जंगलातील नैसर्गिक ध्वनी, वन्यजीवांच्या हालचाली आणि रात्रीच्या जंगलाचा अनोखा अनुभव घेतला. या कार्यक्रमामुळे सहभागींच्या मनात वन्यजीव संवर्धन, जंगल संरक्षण आणि पर्यावरण संतुलन याबाबत जागरूकता निर्माण होण्यास मोठी मदत झाली.
या कार्यक्रमाच्या यशस्वी आयोजनासाठी वनविभागाच्या अधिकाऱ्यांनी व कर्मचाऱ्यांनी अत्यंत नियोजनपूर्वक व समन्वयाने काम केले. सहभागींच्या सुरक्षिततेसाठी आवश्यक सर्व उपाययोजना, मार्गदर्शन व सतत देखरेख ठेवण्यात आली होती.
‘निसर्गानुभव २०२६’ या कार्यक्रमाच्या यशस्वी आयोजनामुळे नागलवाडी वनपरिक्षेत्रातील जैवविविधतेची समृद्धता अधोरेखित झाली असून, अशा प्रकारचे कार्यक्रम नागरिकांमध्ये वन्यजीव संवर्धनाबाबत जनजागृती करण्यासाठी अत्यंत उपयुक्त ठरत आहेत.
हा कार्यक्रम अक्षय गजभिये, उपसंचालक, पेंच व्याघ्र प्रकल्प, नागपूर तसेच संदीप भारती, सहाय्यक वनसंरक्षक (ACF), पेंच व्याघ्र प्रकल्प, नागपूर यांच्या मार्गदर्शनाखाली पार पडला. सदर कार्यक्रमाचे यशस्वी नियोजन व अंमलबजावणी प्रविण लेले, वनपरिक्षेत्र अधिकारी, नागलवाडी वनपरिक्षेत्र यांनी राउंड अधिकारी, क्षेत्रसहाय्यक भेंडाळे व भोयर तसेच अधिनस्त वनकर्मचाऱ्यांच्या सहकार्याने केली.
