– अंबा नदीने ओलांडली इशारा पातळी
नवी मुंबई :- कोकण विभागात पावसाने दमदार हजेरी लावली असून सरासरी पर्जन्यमान 85.60 मिलिमीटर नोंदवले गेले आहे. या कालावधीत रायगड जिल्ह्यात सर्वाधिक 121.40 मिलिमीटर पावसाची मुसळधार नोंद झाली असून, दुसरीकडे सिंधुदुर्ग जिल्ह्यात सर्वात कमी म्हणजेच 37.90 मिलिमीटर पाऊस पडला आहे. सततच्या पावसामुळे रायगड जिल्ह्यातील रोहा तालुक्यातील अंबा नदी सध्या इशारा पातळीवर वाहत असल्याने प्रशासनाकडून नदीकाठच्या गावांना सतर्कतेचा इशारा देण्यात आला आहे. दिलासादायक बाब म्हणजे विभागातील कोणत्याही धरणांमधून सध्या पाण्याचा विसर्ग सुरू नाही.
नैसर्गिक आपत्तीच्या या काळात कोकण विभागात दि. 02 जुलै 2026 पर्यंत एकूण 4 जणांना आपली जीवितहानी गमवावी लागली असून, यामध्ये सर्वाधिक 2 मृत्यू पालघर जिल्ह्यात झाले आहेत. आज 3 जुलै रोजी नव्याने कोणतीही जीवितहानी झालेली नाही. विभागात दि. 02 जुलै 2026 पर्यंत एकूण 18 पाळीव प्राण्यांचा मृत्यू झाला असून, यात 10 मोठी जनावरे आणि 08 लहान जनावरांचा समावेश आहे. पशुधनाची ही संपूर्ण जीवितहानी रत्नागिरी जिल्ह्यात झाली आहे.
सार्वजनिक आणि खाजगी मालमत्तेचेही या पावसामुळे मोठ्या प्रमाणावर नुकसान झाले आहे. विभागात एकूण 4 सार्वजनिक मालमत्तांचे नुकसान झाले असून हे सर्व नुकसान रत्नागिरी जिल्ह्यात नोंदवले गेले आहे. खाजगी मालमत्तेत एकूण 83 घरांचे नुकसान झाले असून, यामध्ये 66 अंशतः पक्की घरे, 01 पूर्णतः कच्चे घर, 07 अंशतः कच्ची घरे आणि 09 इतर मालमत्तांचा समावेश आहे. आज 03 जुलै रोजी एकाच दिवसात 15 खाजगी मालमत्तांचे नुकसान झाले असून, संपूर्ण हंगामात सिंधुदुर्ग जिल्ह्यात सर्वाधिक 40 खाजगी मालमत्तांचे नुकसान झाले आहे.
सध्याच्या परिस्थितीत विभागातून कोणत्याही कुटुंबाचे किंवा लोकसंख्येचे स्थलांतर करावे लागलेले नाही. तसेच सर्व जिल्ह्या मधील रस्ते व रेल्वे वाहतूक पूर्णपणे सुरळीत सुरू आहे. आपत्कालीन परिस्थितीचा सामना करण्यासाठी आणि मदतकार्यासाठी कोकण विभागात एनडीआरएफच्या (NDRF) 08 तुकड्या तैनात करण्यात आल्या असून, यामध्ये 13 अधिकारी आणि 240 सदस्यांचा समावेश आहे. आपत्ती व्यवस्थापन कक्ष परिस्थितीवर पूर्णपणे लक्ष ठेवून आहे.
