– चिमुकल्यांनी स्वतः तयार केलेल्या राख्या बांधून दिला बंधुभाव, प्रेम व सामाजिक ऐक्याचा संदेश
कान्होली :- सार्वजनिक वाचनालय, कान्होली येथे रक्षाबंधनाचा सण उत्साहपूर्ण आणि आनंदी वातावरणात साजरा करण्यात आला. या निमित्ताने आयोजित करण्यात आलेल्या विशेष उपक्रमात लहान मुलांनी उत्स्फूर्त सहभाग घेत स्वतःच्या कल्पकतेतून आकर्षक राख्या तयार केल्या. त्यानंतर या राख्या मित्र परिवारातील सदस्यांना व भावंडांना प्रेमाने बांधून रक्षाबंधनाचा आनंद साजरा करण्यात आला. रक्षाबंधन हा केवळ भाऊ- बहिणीच्या प्रेमाचा सण नसून परस्परांतील जिव्हाळा, आपुलकी, विश्वास, बंधुभाव आणि सामाजिक एकात्मतेचे प्रतीक आहे. याच भावनेतून सार्वजनिक वाचनालयात हा उपक्रम राबविण्यात आला. चिमुकल्यांनी विविध रंग, सजावटीचे साहित्य आणि कलात्मक कल्पनांचा वापर करून स्वतः राख्या तयार केल्या. राखी तयार करताना मुलांमध्ये मोठा उत्साह दिसून आला. कार्यक्रमा दरम्यान मुलांनी एकमेकांना राखी बांधत प्रेम आणि मैत्रीचे नाते अधिक दृढ केले. उपस्थित नागरिक, पालक आणि मित्र परिवारातील सदस्यांनी मुलांच्या उत्स्फूर्त सहभागाचे कौतुक केले. अशा सर्जनशील उपक्रमांमुळे मुलांच्या कलागुणांना वाव मिळण्याबरोबरच त्यांच्यात संस्कार, सहकार्याची भावना, सामाजिक जाणीव आणि एकोप्याची भावना निर्माण होण्यास मदत होते, असे उपस्थितांनी सांगितले. कार्यक्रमस्थळी रक्षाबंधनाच्या निमित्ताने आकर्षक सजावट करण्यात आली होती. चिमुकल्यांच्या उत्साहामुळे संपूर्ण वातावरण आनंदमय झाले होते. विविध वयोगटातील मुलांनी सहभागी होत एकमेकांसोबत आनंदाचे क्षण अनुभवले. या उपक्रमातून ‘एकमेकांची काळजी घेणे आणि परस्परांचा सन्मान करणे’ हा संदेशही देण्यात आला. कार्यक्रमाच्या यशस्वी आयोजनासाठी मिलिंद कोवे (उपसरपंच), प्रदीप इटनकर, भावेश वलके, अरविंद कोवे, नंदू कुमरे, गौरव गोंडगे, मंगल कोवे, राज कळंबे, कुणाल कोवे, हर्षल कंगाले, तन्मय कोवे, नीता रंदई, आंचल कोवे, जयश्री आडे, मीरा मडावी, देवयानी इटनकर आणि करिष्मा अगले यांनी विशेष सहकार्य केले. या कार्यक्रमास कान्होली गावातील नागरिक, पालक, महिला, युवक तसेच लहान मुले मोठ्या संख्येने उपस्थित होते. उपस्थितांनी रक्षाबंधनाच्या शुभेच्छा देत अशा सामाजिक व संस्कारक्षम उपक्रमांचे सातत्याने आयोजन व्हावे, अशी अपेक्षा व्यक्त केली. कार्यक्रमाच्या शेवटी सहभागी सर्व बालकांचे तसेच कार्यक्रमासाठी प्रत्यक्ष- अप्रत्यक्ष सहकार्य करणाऱ्या मित्र परिवारातील सदस्यांचे आभार मानण्यात आले. वाचनालयाच्या माध्यमातून आयोजित करण्यात आलेल्या या उपक्रमामुळे रक्षाबंधनाचा सण आनंद, स्नेह आणि सामाजिक एकात्मतेच्या वातावरणात साजरा झाला.