– मुसळधार पावसासह विजांचा कडकडाट ; खोपडी शिवारात दुर्दैवी घटना
कन्हान :- पोलीस स्टेशन अंतर्गत मौजा खोपडी (खेडी) येथील शेतात मजुरीच्या कामासाठी गेलेल्या ६५ वर्षीय महिलेचा मृतदेह दुसऱ्या दिवशी सकाळी शेताच्या बांधावर आढळुन आल्याने परिसरात हळहळ व्यक्त होत आहे. सुलोचना देवरावजी ठाकरे वय ६५ वर्ष रा. खोपडी असे मृत महिलेचे नाव आहे. प्राथमिक माहितीनुसार मुसळधार पाऊस आणि विजांच्या कड कडाटा दरम्यान वीज पडल्याने महिलेचा मृत्यु झाला असावा अशी शक्यता व्यक्त करण्यात आली आहे.
प्राप्त माहितीनुसार सुलोचना ठाकरे शुक्रवार (दि.१८) सप्टेंबर रोजी सकाळी १० वाजता दरम्यान आपल्या मामी रेखा लक्ष्मण वराडे, उषा रामेश्वर वराडे आणि चंद्रबाई रघुनाथ वराडे यांच्यासोबत खोपडी शिवारातील शेतात मजुरीच्या कामासाठी गेल्या होत्या. संबंधित शेत हे लक्ष्मण वराडे यांनी ठेक्याने केले असल्याचे तक्रारीत नमुद आहे. दुपारी सुलोचना घरी परतल्या नसताना सायंकाळी सुमारे ५ वाजताच्या सुमारास परिसरात मुसळधार पावसाला सुरुवात झाली. त्यावेळी आकाशात जोरदार विजांचा कडकडाट सुरू होता. रात्रीपर्यंत त्या घरी न परतल्याने त्या नातेवाईकांकडे गेल्या असाव्यात असे कुटुंबीयांना वाटले.
शनिवार (दि.१९) सप्टेंबर रोजी सकाळी ६.३० वाजता दरम्यान विकास वराडे यांनी प्रविण ठाकरे यांना फोन करून सुलोचना घरी आहेत का अशी विचा रणा केली. त्या घरी नसल्याचे समजल्यानंतर कुटुंबी यांनी त्यांचा शोध सुरू केला. सकाळी ७ वाजता शेजा रील शेतातील बांधीत सुलोचना ठाकरे यांचा मृतदेह आढळुन आला. घटनेची माहिती मिळताच कन्हान पोलिस घटनास्थळी दाखल झाले. पोलीसांनी घटना स्थळाचा पंचनामा करुन शवविच्छेदना करिता उपजि ल्हा रुग्णालय कामठी येथे नेण्यात आले. या प्रकरणी कन्हान पोलीसांनी प्रवीण ठाकरे यांचा तक्रारीवरून मर्ग क्र. ३८/२०२६, कलम १९४ बीएनएसएस अन्वये गुन्ह्याची नोंद करण्यात आली. मृत महिलेचा मृत्यु विजेचा धक्का अथवा वीज पडल्यामुळे झाला असावा अशी प्राथमिक शक्यता वर्तविण्यात येत असुन पुढील तपास पोलीस निरीक्षक वैजयंती मंडवधरे यांचा मार्ग दर्शनात पोलीस हवालदार नरेश बाटबारई करीत आहे.