किशोर साहू, मौदा :- विद्यार्थ्यांमध्ये वाचनाची आवड निर्माण व्हावी, वाचन संस्कृती रुजावी आणि विद्यार्थ्यांच्या भाषिक कौशल्यांचा विकास व्हावा, या उद्देशाने जिल्हा परिषद प्राथमिक शाळा तोंडली येथे गुरुवार, १५ ऑक्टोबर रोजी भारतरत्न डॉ. ए. पी. जे. अब्दुल कलाम यांच्या जयंतीनिमित्त वाचन प्रेरणा दिन उत्साहात साजरा करण्यात आला.
या प्रसंगी ‘एकूण माझी शाळा’ या उपक्रमांतर्गत विद्यार्थ्यांसाठी विविध वाचनविषयक आणि भाषिक कौशल्यविकासाच्या उपक्रमांचे आयोजन करण्यात आले. यामध्ये ‘आवडते पुस्तक—माझा मित्र’, प्रकट वाचन, वाचलेल्या पुस्तकाचा सारांश सांगणे, पुस्तकाचे मुखपृष्ठ व मलपृष्ठ यांची माहिती देणे, चित्रवर्णन, कथाकथन आणि प्रश्नमंजुषा अशा विविध उपक्रमांचा समावेश होता.
विद्यार्थ्यांनी आवडीची पुस्तके निवडून त्यांचे लक्षपूर्वक वाचन केले. वाचलेल्या पुस्तकातील आशय स्वतःच्या शब्दांत मांडणे, पुस्तकाचा सारांश सांगणे, मुखपृष्ठ व मलपृष्ठाचे निरीक्षण करून त्याविषयी माहिती देणे, चित्रांचे वर्णन करणे आणि गोष्टी प्रभावीपणे सांगणे अशा कृतींतून विद्यार्थ्यांनी आपल्या वाचन, आकलन आणि अभिव्यक्ती कौशल्यांचे दर्शन घडविले.
विद्यार्थी एकाग्रतेने, समजपूर्वक आणि योग्य उच्चारांसह वाचन करताना पाहून शाळेच्या मुख्याध्यापिका अनुराधा धुर्डे आणि शिक्षक निलेश जाधव यांना विशेष आनंद झाला. विद्यार्थ्यांच्या वाचनातील प्रगती आणि त्यांचा उत्स्फूर्त सहभाग पाहून त्यांनी समाधान व्यक्त केले. विद्यार्थ्यांमध्ये वाचनाची आवड निर्माण करण्यासाठी घेतलेल्या परिश्रमांचे सार्थक झाल्याची भावना यावेळी व्यक्त झाली.
पुस्तकांशी मैत्री, नियमित वाचन आणि वाचलेल्या साहित्याचे आकलन या माध्यमांतून विद्यार्थ्यांचा आत्मविश्वास, शब्दसंपत्ती, कल्पनाशक्ती आणि विचारक्षमता विकसित होण्यास मदत होते. या उपक्रमातून विद्यार्थ्यांना वाचनाचा आनंद मिळण्यासोबतच स्वतःचे विचार प्रभावीपणे मांडण्याची संधीही मिळाली.
‘वाचाल तर वाचाल, वाचनातूनच घडेल उज्ज्वल भविष्य’ हा संदेश देत शाळेत वाचन संस्कृती जोपासण्याचा संकल्प करण्यात आला. विद्यार्थ्यांच्या सर्वांगीण विकासासाठी राबविण्यात आलेला हा उपक्रम प्रेरणादायी ठरला.
