– चित्रा आर्ट क्लासेसच्या विद्यार्थिनींसह ५ दिवसांच्या परिश्रमातून १०×८ फुटांची नयनरम्य कलाकृती साकार
हंसराज, भंडारा :- शारदीय नवरात्रोत्सवाच्या पहिल्या माळेला भंडारा येथील प्रसिद्ध शीतला माता मंदिरात भक्ती आणि कलेचा एक अनोखा संगम पाहायला मिळाला. नवरात्रीच्या पावन पर्वावर मंदिरामध्ये शीतला मातेची तब्बल १० बाय ८ फूट आकाराची भव्य आणि हुबेहूब ३-डी (3D) पोर्ट्रेट रांगोळी साकारण्यात आली आहे. ही रांगोळी इतकी जिवंत आणि प्रभावी आहे की, प्रत्यक्ष साक्षात देवीच मंदिरात विराजमान झाली आहे की काय, असा भास भाविकांना होत आहे.
ही अप्रतिम रांगोळी ‘चित्रा आर्ट क्लासेस’च्या संचालिका व प्रशिक्षिका चित्रा वैद्य यांच्या मार्गदर्शनाखाली आणि त्यांच्या विद्यार्थिनी वंशिका निनावे, दीप्ती भोले व वैशाली मेहर यांनी सलग ५ दिवसांच्या अथक परिश्रमातून पूर्ण केली आहे.
५ दिवसांची मेहनत आणि केशरी रंगांची जादू
नवरात्रीच्या पहिल्या दिवसाचे औचित्य साधून केशरी रंगाच्या विविध छटांचा (Shades) आणि बारीक नक्षीकामाचा अत्यंत कल्पकतेने वापर करण्यात आला आहे. देवीच्या मुखावरील तेज, डोळ्यांमधील वात्सल्य आणि दागिन्यांची सुबकता या रांगोळीत ३-डी तंत्राच्या माध्यमातून बारकाईने रेखाटण्यात आली आहे. १० बाय ८ फुटांच्या विस्तीर्ण जागेवर ही प्रतिमा साकारण्यासाठी या कलाकारांनी सलग पाच दिवस दिवस-रात्र मेहनत घेतली.
भाविकांची दर्शनासाठी गर्दी व कौतुकाचा वर्षाव
नवरात्रोत्सवाच्या पहिल्याच दिवशी मंदिरात दर्शनासाठी आलेल्या भाविकांचे लक्ष या रांगोळीने वेधून घेतले. साक्षात देवीचे दर्शन घडवणाऱ्या या अप्रतिम कलेचे सर्व स्तरातून भरभरून कौतुक होत असून, ही रांगोळी पाहण्यासाठी भाविकांची मोठी गर्दी होत आहे.
या कलाकृतीबद्दल भावना व्यक्त करताना प्रशिक्षिका चित्रा वैद्य म्हणाल्या, “नवरात्रीच्या पहिल्या माळेचा शुभारंभ माझ्या विद्यार्थिनींसोबत मिळून साकारलेल्या या पोर्ट्रेट रांगोळीने झाला. मातेचे हे तेजस्वी रूप स्वतःच्या कलेतून साकारण्याचे भाग्य लाभले, ही माझ्यासाठी आणि संपूर्ण चमूसाठी अत्यंत आनंदाची आणि अभिमानाची गोष्ट आहे.” “कलेतून देवीची सेवा घडल्याचे मोठे समाधान”
– चित्रा वैद्य चित्रा आर्ट क्लासेस संचालिका
