– सन 2026-27 साठी मनपाचा 6202.99 कोटी रुपयांचा अर्थसंकल्प सभागृहात सादर
– स्थायी समितीच्या सभापती शिवानी दाणी-वखरे यांनी अर्थसंकल्प मांडला
– नगरसेवकांच्या विकास निधी आता 25 लाख रुपयांचा
– सर्वसामान्य जनतेसाठीचा सर्वस्पर्शी अर्थसंकल्प- महापौर निता ठाकरे
नागपूर :- नागपूरकर नागरिकांवर कोणताही कराचा वाढीव बोजा न टाकता समाजातील सर्व घटकांना विकासाच्या साखळीमध्ये सामावून घेत महापौर माहेर योजना, मजुरांसाठी ठिय्या, स्मार्ट प्रभाग, सावजी बुनकर व मारबत महोत्सव, उद्याने व मैदानांचा विकास तसेच नाग नदी प्रदूषण मुक्त करण्यासाठी कर्ज रोखे काढून रू. २०० कोटी उभारणार आहे. अशा नव्या संकल्पांसह स्थायी समितीच्या सभापती शिवानी दाणी-वखरे यांनी नागपूर महानगरपालिकेचा सन 2026-27 या आर्थिक वर्षासाठी 6202 कोटी 99 लाख रुपयांचा शिलकीचा अर्थसंकल्प (ता. 27) महानगरपालिकेच्या सभागृहात महापौर निता ठाकरे यांना सादर केला. याचवेळी सन 2025-26 या आर्थिक वर्षासाठीचा सुधारित अर्थसंकल्पही स्थायी समितीच्या अध्यक्षांनी सादर केला.
गेल्या 19 मे रोजी स्थगित झालेली मनपाची विशेष सभा आज कविवर्य सुरेश भट सभागृहात पार पडली. अध्यक्षस्थानी महापौर निता ठाकरे होत्या. यावेळी उपमहापौर लिला हाथीबेड, सत्तापक्षनेता नरेंद्र (बाल्या) बोरकर, आयुक्त डॉ. विपीन, विरोधी पक्ष नेता संजय महाकाळकर, निगम सचिव डॉ. रंजना लाडे यांच्यासह अतिरिक्त आयुक्त अंकित, अतिरिक्त आयुक्त मिलिंद मेश्राम यांच्यासह मनपाचे सर्व नगरसेवक व अधिकारी उपस्थित होते.
मनपा स्थायी समितीच्या सभापती शिवानी दाणी-वखरे यांनी 2026-27 या आर्थिक वर्षात मनपाचे आर्थिक उत्पन्न 5690 कोटी 37 लाख राहणार असून सुरूवातीची शिल्लक 512 कोटी 61 लाख रुपये मिळून एकूण उत्पन्न 6202 कोटी 99 लाख रुपयांचे उत्पन्न गृहित धरले आहे. यात 6202 कोटी 48 लाख रुपये खर्चाच्या बाजूला राहणार असून आर्थिक वर्षाच्या अखेरीस मनपाच्या तिजोरीत 50.18 लाख रुपयांची शिल्लक राहणार असल्याचे त्यांनी सांगितले.
केंद्र व राज्य सरकारचे अनुदान तसेच मनपाच्या आर्थिक स्त्रोतामध्ये वाढ करण्याचा संकल्प करून नागपूरच्या प्रत्येक घटकासाठी व शहराचा सर्वांगिण विकास करण्यासाठी कटिबद्ध असल्याचे त्यांनी सांगितले. शहराचा भौतिक विकास करताना नागपूर शहराचा ऐतिहासिक, सांस्कृतिक वारसा लक्षात घेऊन शहराला विकसित शहराच्या यादीत आणण्याचा हा प्रयत्न असल्याचे त्यांनी सांगितले. तसेच मनपाच्या अमृत महोत्सवी वर्षानिमित्त देशातील सर्व महापौर आणि स्थायी समिती अध्यक्ष यांची राष्ट्रीय परिषद घेण्यात येणार असल्याचे त्यांनी स्पष्ट केले. नागपूरला कर्करोग मुक्त करण्यासाठी आरोग्य तपासणी केली जाईल. तसेच महापौर हर्ष, मुस्कान योजना अंतर्गत १८ वर्षांखालील मुलींचे दातांवर उपचार करण्यासाठी रू.२५ लक्षाचे अनुदान दिले जाईल.
नगरसेवकांचा विकास निधी 25 लाखाचा
स्थायी समितीच्या सभापती शिवानी दाणी-वखरे यांनी प्रभागामध्ये विकास कामावर खर्च करण्यासाठी प्रत्येक नगरसेवकाला 25 लाख रुपये निधी देण्याची घोषणा केली.
छत्रपती शिवाजी महाराज यांचा अश्वारूढ पुतळा
महाराष्ट्राचे आराध्यदैवत छत्रपती शिवाजी महाराजांचा अश्वारूढ पुतळा मनपा मुख्यालय परिसर व वर्धमान नगर येथील शिवाजी महाराज चौकात उभारण्यात येणार असून, याकरिता अर्थसंकल्पात ५० लक्ष रुपयांची तरतूद करण्यात आली आहे.
DUCTING POLICY
२०१५ साली १००० कि.मी. च्या वर फायबर ऑप्टीक केबल चे जाळे स्मार्ट सिटी द्वारे पसरविण्यात आले होते. याची सुस्थिती व दुरुस्ती व नवनिर्माण करणे आवश्यक आहे. परंतु महानगरपालिकेचा कुठलाही आर्थिक खर्च न करता आर्थिक उत्पन्नाचे नवीन स्त्रोत निर्माण करता येईल. याद्वारे मोठ्या प्रमाणात महानगरपालिकेचे उत्पन्न वाढविण्यात मदत होईल. याद्वारे जमिनीखालील युटिलिटी सुव्यवस्थित होतील तसेच आकाशातील तारांचे जाळे कमी होण्यास आणि भविष्यात संपण्यात मदत होईल. त्यामुळे नागपूर शहराच्या सौंदर्यात वाढ होईल.
७५० एमएलडी पाण्याची उपलब्धता नागपूर महानगरपालिकेद्वारे असल्याने सद्य स्थितीत गरज ही तेवढी नाही, नजीकच्या भविष्यात ऑरेंज सिटी बोटलिंग प्लांट टाकून त्याद्वारे अधिक उत्पन्न महानगर पालिकेला मिळेल, असा मानस आहे. तसेच पाणी बिलावर जाहिरातींच्या माध्यमातून सुद्धा उत्पन्न वाढविण्याचे प्रयत्न करण्यात येणार आहे.
अमृत महोत्सवी वर्षानिमित्त मनपाचे शताब्दी संग्रहालय
नागपूर महानगरपालिकेच्या अमृत महोत्सवी वर्षानिमीत्त नागपूर महानगरपालिका या आर्थिक वर्षात संग्रहालय निर्माण करणार आहे. नागपूर महानगरपालिका क्षेत्रातील नामांकीत व्यक्तींच्या मार्गदर्शनानुसार शताब्दी संग्रहालय तयार करण्यात येणार असून याकरीता आवश्यक ती आर्थिक तरतुद करण्यात येणार आहे.
नागपूर शहराचा मागील ३०० वर्षाचा इतिहास ऑडीओ व्हिज्युअल रूपात जनतेला बघायला मिळावा आणि त्यांना एक वेगळा अनुभव मिळावा याकरीता हेरीटेज दर्जा प्राप्त असलेल्या जुन्या ऐतिहासक नगरभवन सभागृहामध्ये Experience Centre तयार करण्यात येणार, आहे. जी नागपूरच्या पर्यटनात विशेष भर घालणार आहे.
२०० क्रीडा मैदानाचा विकास तसेच भव्य क्रीडा संकुल
मुख्यमंत्री देवेन्द्र फडणवीस व केन्द्रीयमंत्री नितिन गडकरी यांच्या सूचनेनुसार २०० क्रीडा मैदानाचा विकास करण्याचे उद्दिष्टे महानगर पालिके समोर ठेवले आहे. त्यापैकी या अमृतमहोत्सवी वर्षामध्ये ७५ क्रिडामैदानाचा विकास करण्याचा या स्थायी समितीचा मानस आहे.
शहरातील क्रीडा विकासाची उद्दिष्टे साध्य करण्यासाठी यावर्षीच्या अंदाजपत्रकात् रु. ४५.०० कोटीची तरतूद करण्यात आलेली आहे. तसेच नागपूर शहरामध्ये नव्याने भव्य क्रीडा संकुल तयार करण्यात आले असून ते नियमित सुरु आहे. खेळाडूंना या संकुलामध्ये सर्व सुविधा अल्पदरात उपलब्ध आहे.
५ रस्त्यावर पे ॲण्ड पार्क योजना
वाहतूक कोंडी कमी करण्यासाठी आणि पार्किंगची समस्या सोडवण्यासाठी शहरातील प्रमुख मागांमध्ये Pay & Park साठी ५ रस्ते नियोजित करून त्याची प्रभावी अंमलबजावणी करण्यात येईल. हा उपक्रम प्रारंभी प्रायोगिक तत्त्वावर राबविण्यात येईल, ज्यामुळे त्याची परिणामकारकता आणि नागरिकांचा प्रतिसाद यांचे मूल्यमापन करता येईल. या उपक्रमामुळे अव्यवस्थित पार्किंगला आळा बसेल, वाहतुकीचा खोळंबा कमी होईल आणि नागरिकांना अधिक सुलभ व शिस्तबद्ध पार्किंग सुविधा उपलब्ध होतील. प्रायोगिक टप्पा यशस्वी ठरल्यास, समग्र पार्किंग धोरण (Parking Policy) तयार करण्यात येईल.
वार्डातील लोकोपयोगी कामाकरिता 25.00 लक्ष निधी
या अर्थसंकल्पात वार्डातील लोकपयोगी कामांकरिता जो प्रभाग निधी प्रस्तावित करण्यात येतो रु. २५.०० लक्ष प्रभागातील प्रति सदस्याप्रमाणे राखीव ठेवण्यात आलेला आहे. तसेच मागिल आर्थिक वर्षाच्या अपूर्ण राहीलेल्या ज्यांचे कायदिश झालेले आहे परंतु काम सुरू झाले नाही व ज्या प्रकरणात निविदा प्रक्रीया पुर्ण झाली व विभागाने कायर्यादेश निर्गमित केले नाही अशा सर्व कामांकरीता बांधील खर्चासहीत रू. ४१.३८ कोटीची या आर्थिक वर्षात करण्यात आली आहे.
रेन वॉटर हारवेस्टींग व वॉटर
शहरातील ग्राहक दररोज १ लाख लिटर पेक्षा जास्त पाणी वापरतात (५४ ग्राहक) असे सर्व ग्राहकांना त्यांच्या परिसरात ई.टी.पी. किंवा एस.टी.पी. यावर्षी बसविण्याबाबतची ताकीद देण्यात आलेली आहे. सर्व शासकीय कार्यालयाला त्यांच्या परिसरात रुफ टॉप वॉटर हारवेस्टींग करण्यासाठी विनंती करण्यात आलेली आहे. नागपूर शहरातील भूजल पातळीमध्ये बाढ व्हावी यादृष्टीने नागपूर महानगरपालिकेच्या इमारती, बगीचे यात रेन बॉटर हार्वेस्टींगची कामे हाती घेण्यात आली आहे. त्याचप्रमाणे शहरात रस्त्यालगत २०९ जागी Recharge shaft प्रणाली विविध ठिकाणी पाऊस पाणी संकलन करण्याचे प्रस्तावित आहे.
येथून पुढे टप्पा ५ किंवा मोठे, लहान रस्ते, पॉलीसी म्हणून रेन वॉटर हार्वेस्टिंग अनिवार्य करण्यात येईल आणि त्याची अंमलबजावणी कटाक्षाने करण्याचे निर्देश दिले जातील, हे सध्या लोकसहभागातूनच – होणे असल्याने, सर्व लोकप्रतिनिधी आणि जनता ह्यांच्या मदतीने हे साध्य करण्याचे उद्देश ठेवले आहे.
महापौर नेत्र ज्योती योजना
संपूर्ण देशात बऱ्याच प्रमाणात मोतीया बिंदुचे रुग्ण निघत आहे. जर त्यांचेवर वेळीच मोतीया बिंदुची शस्त्रक्रिया झाली नाही तर त्या व्यक्तीचे जिवनात अंधत्व येण्याची शक्यता नाकारता येत नाही. यावर उपाययोजना म्हणून नागपूर शहरात प्रत्येक प्रभागात मोतीया बिंदु शस्त्रक्रिया संबंधाने नेत्र तपासणी
शिबीरे आयोजीत करुन त्या रुग्णांची मोतीया बिंदु शस्त्रक्रिया निःशुल्क करण्याचा आमचा मानस आहे. शस्त्रक्रिये नंतर त्यांना चष्मा सुध्दा निःशुल्क पुरविण्याची जबाबदारी महानगरपालिका घेत आहे. ही योजना सुध्दा महात्मे नेत्रपेढी व नागपूर महानगरपालिका यांच्या संयुक्तीक उपक्रम राहील. या योजनेसाठी लागणाऱ्या सर्व खर्चाची व्यवस्था सी.एस. आर. निधी किंवा शासनाच्या विविध योजना मधून करण्याची जबाबदारी महात्मे नेत्रपेढी या संस्थेची राहील.
मनपातील विधानसभा क्षेत्रात 12 नव्या दमाच्या युपीएससी
मनपातील ६ विधानसभा क्षेत्रात प्रत्येकी २ युपीएचसी चे प्रोटोटाइप निश्चित करून, १२ नव्या दमाच्या युपीएचसी तयार करण्याचा मानस असेल. त्या साठी विशेष तरतूद ठेवण्यात आली आहे. पुढील ५ वर्षात ५३ युपीएचसी नवनिर्मित करून जनतेच्या चांगल्या आरोग्य साठी प्रयत्न करण्याचा मानस आहे.
शहरातील ज्येष्ठ नागरिकांना सुविधा
शहरातील ज्येष्ठ नागरिकांना सुविधा यामध्ये जेष्ठ नागरिकांचे हेल्थ कॅम्प घेणे, ज्येष्ठ नागरिकांच्या सहली आयोजीत करणे, ज्येष्ठ नागरिकांमध्ये उत्साह निर्माण करण्यासाठी विविध प्रकारचे शिबीरांचे आयोजन करणे व ज्येष्ठ नागरिकांना आवश्यक सुविधा देणे. ही सर्व कामे एनजीओ व मनपा यांचे संयुक्त विद्यमाने समाज कल्याण विभागाचे माध्यमतातून राबविण्यात येतील. ज्येष्ठ नागरिकांच्या विविध कार्यासाठी प्रत्येक नगरसेवकांचे माध्यमातून खर्च करण्यासाठी रु. २ लक्ष निधी राखीव ठेवण्यात आला आहे.
प्रत्येक नगरसेवकांनी प्रभागात ज्येष्ठ नागरिकांचे विभागाच्या माध्यमातून गट निर्माण करण्यात येईल व व त्या गटांना वरील सुविधांचा लाभ मिळेल, यामुळे ज्येष्ठ नागरिकामधील नैराश्याची भावना दुर होऊन एक सुखद आयुष्य जगण्यास मनपा.च्या या प्रकल्पाव्दारे मदत होईल
माजी महापौर पुष्पाताई घोडे सायकल बँक योजना
महानगरपालिका क्षेत्रातील या अमृत महोत्सवी वर्षानिमित्त ७५ प्रतिभावान व हुषार मुलींना या सायकल देण्यात येतील. त्यामुळे या विद्यार्थीनींना चालना मिळेल.
प्रती विधानसभा २ अशा १२ शाळा पुनर्निर्माण
प्रती विधानसभा २ अशा १२ शाळा पुनर्निर्माण करणार आहे. शासन आणि महानगरपालिका असे मिळून ते करणार असून मनपा द्वारे ३० कोटी रुपयांची तरतूद केली आहे
नाविन्यपूर्ण विशेष योजना
नागपूर पर्यटन विकास योजना
नागपूर शहराला पर्यटनाच्या नकाशावर प्रामुख्याने आणण्यासाठी नागपूर पर्यटन विकास योजना राबविण्यात येणार आहे. यात शहरातील ऐतिहासिक स्थळे, सांस्कृतिक वारसा, मंदिरातून शहराची वेगळी ओळख दिसून येते. आपले शहर, आपली ओळख अंतर्गत शहरातील 100 चौकांमध्ये क्यूआर कोडच्या माध्यमातून माहिती देण्याचा प्रयत्न करण्यात येईल.
मारबत महोत्सव
नागपूर शहरातील हा एक विशेष सांस्कृतिक घटना आहे. यातून पर्यटकांचा ओघ वाढविण्यासाठी या देशातील वैशिष्ट्यपूर्ण सांस्कृतिक उपक्रमाचा उपयोग करून घेतला जाईल.
पुष्पाताई घोडे सायकल बँक योजना
दिवंगत माजी महापौर पुष्पाताई घोडे यांच्या स्मृतीनिमित्त शहरातील 75 प्रतिभावान मुलींना मोफत सायकलचे वाटप केले जाणार आहे.
युवकांसाठी सुषमा स्वराज योजना
शहरातील प्रत्येक विधानसभा मतदारसंघात माफक दरात विद्यार्थ्यांना यूपीएससी व एमपीएसीच्या स्पर्धा परीक्षांसाठी मार्गदर्शन केंद्र उपलब्ध करून दिले जाईल.
प्रमिलाताई मेंढे भाषा शिकवणी केंद्र
राष्ट्रसेविका समितीच्या माध्यमातून समाज कार्य केलेल्या प्रमिलाताई मेंढे यांच्या स्मृतीनिमित्त शहरात जपानी, जर्मन, फ्रेंच शिकविण्यासाठी ई-लायब्ररीमध्ये सुविधा उपलब्ध करून दिली जाईल.
माझा प्रभाग , स्मार्ट प्रभाग
या योजनेअंतर्गत स्मार्ट, शाश्वत व पर्यावरण पूरक तत्वावर जो प्रभाग कर संकलन, पाणी कर संकलन, स्वच्छता, अभिनव योजना राबविण्यात अग्रेसर राहील, त्या प्रभागाला 50 लाख रुपयांचा विशेष निधी दिला जाणार आहे.
महापौर माहेर योजना
लग्न झाल्यानंतर नागपूर शहराच्या बाहेर गेलेल्या उल्लेखनीय कार्य करणार्या विवाहितांचा मकरसंक्रांतीला माहेरवाशिण मानून महापौरांतर्फे त्यांची ओटी भरून नागपूरकरवासियांतर्फे सन्मान करण्यात येणार आहे. शहराच्या बाहेर असल्या तरी शहराशी नाते अधिक भक्कम करण्याचा यामागे हेतू आहे.
मजुरासाठी ठिय्या
विकसित होत असलेल्या नागपूर शहरात मोठ्या प्रमाणावर कामगार कामानिमित्त येत असतात. त्यांच्यासाठी विश्रांती केंद्र (ठिय्या) उभारण्याची घोषणा स्थायी समिती अध्यक्षांनी या अर्थसंकल्पात केली. सर्व झोनमध्ये ही योजना राबविण्यात येईल.
इलेक्ट्रिक सोलर योजना
मनपातर्फे स्वच्छ व परवडणारी उर्जा उपलब्ध करून देण्यासाठी 5 हजार सोलर शेगड्या वितरित केल्या जाणार आहे. यामुळे पर्यावरण प्रदूषण मुक्त राखण्यासाठी मदत होणार आहे.
हॉटेलचे मूल्यांकन होणार
शहरातील हॉटेलचा दर्जा वाढविण्यासाठी हॉटेलचे वर्गीकरण व प्रमाणपत्र प्रणाली राबविण्यात येणार आहे. या मूल्यांकनानुसार हॉटेलला प्रमाणपत्र प्रदान करण्यात येईल. यामुळे पर्यटकांना हॉटेलमध्ये चांगली सुविधा मिळण्यास मदत होईल.
मुख्यमंत्री फडणवीस व केंद्रीय मंत्री गडकरी यांचा उल्लेख
शहराच्या विकासामध्ये मुख्यमंत्री देवेंद्र फडणवीस व केंद्रीय परिवहन व राष्ट्रीय महामार्ग मंत्री नितीन गडकरी, पालकमंत्री चंद्रशेखर बावनकुळे यांनी दिलेल्या योगदानाचा व मार्गदर्शनाचा स्थायी समितीच्या सभापती शिवानी दाणी-वखरे यांनी आवर्जून उल्लेख केला.
सर्वंकष व सर्वस्पर्शी अर्थसंकल्प – महापौर
स्थायी समितीच्या सभापती शिवानी दाणी-वखरे यांनी यावर्षी सादर केलेला मनपाचा अर्थसंकल्प सर्वसामान्याच्या जनतेला दिलासा देणारा व सर्वंकष विकासाला चालना देणारा अर्थसंकल्प असल्याची प्रतिक्रिया महापौर निता ठाकरे यांनी व्यक्त केली.
अर्थसंकल्प वीरमातांना समर्पित
भाषणाची सुरूवात करताना स्थायी समितीच्या सभापतींनी हा अर्थसंकल्प राजमाता जिजाऊपासून ऑपरेशन सिंदूरमध्ये शहीद झालेल्या सर्व विरांच्या मातांना समर्पित असल्याचे सांगितले.
जलपर्णी बॅगचे वितरण
शहरातील तलावांमध्ये आढळणारी पर्यावरणाला घातक असलेल्या जलपर्णीपासून तयार करण्यात आलेल्या बॅगमध्ये नगरसेवकांना अर्थसंकल्पाची प्रत वितरित करण्यात आली.
#VISITNagpur पुस्तिका
परदेशातील अनेक शहरांमध्ये सिटी सेंटरवर पर्यटकांसाठी माहितीपूर्ण पुस्तिका सहज उपलब्ध असतात. त्या पुस्तिकांमध्ये एका दिवसात शहर कसे फिरावे, प्रमुख आकर्षणे कोणती, खाद्य संस्कृतीची ठिकाणे कोणती याची सविस्तर माहिती दिलेली असते. मात्र, नागपूरसारख्या वेगाने विकसित होत असलेल्या शहरात अशी एकत्रित व अधिकृत माहिती उपलब्ध नाही. ही उणीव लक्षात घेऊन #VisitNagpur या उपक्रमांतर्गत एक सर्वसमावेशक, आकर्षक आणि अययावत माहिती पुस्तिका तयार करण्यात येणार आहे. नागपूर शहरातील विविध सांस्कृतिक, पारंपरिक, औद्योगिक तसेच क्रीडा उत्सवांचे एकत्रित वार्षिक फेस्टिव्हल कॅलेंडर तयार करण्यात येईल.
मत्सालय
Maharashtra Fisheries Department यांच्या माध्यमातून नागपूरमध्ये एक अत्याधुनिक मत्स्यालय (Aquarium) उभारण्याचा महत्त्वाकांक्षी प्रकल्प साकार होणार आहे. या प्रकल्पासाठी नागपूर महानगरपालिका आवश्यक जागा उपलब्ध करून देईल, तर फिशरीज विभागाकडून आधुनिक तंत्रज्ञानयुक्त, आकर्षक आणि दर्जेदार मत्स्यालय उभारण्यात येईल.
लहान मुलांसाठी विशेष
नागपूर महानगरपालिके तर्फे राष्ट्रीयत्व जागृत लहान मुलांमध्ये व्हावे म्हणून सुरेश भट सभागृहात विशेष बाल चित्रपट महोत्सव आयोजित करण्यात येईल. त्यात प्रामुख्याने महात्मा ज्योतिबा फुले ह्यांच्या द्वि शताब्दी निमित्त्य, सरदार वल्लभभाई पटेल हयांची १५० वी जयंती, अहिल्या बाई होळकर ह्यांची ३०० वी जयंती, शिवराज्याभिषेकाची नुकतीच झालेली ३५० वी जयंती च्या उपलक्षाने, महानगरपालिकेच्या विद्यार्थ्यांसाठी तसेच इतर शिशु वर्गासाठी आणि मुलांसाठी या महोत्सवाचे आयोजन निःशुल्क करण्यात येईल. बालजगत सोबत संयुक्त विद्यमाने काही प्रकल्प राबविण्यात येतील.
महा संगीत
शहरात सकाळी ७ ते ८ एक तास ठराविक चौकांवर दररोज महाराष्ट्रातील संस्कृतीवर आधारित संगीत प्रत्येक चौकात मधुर आवाजात वाजवण्यात येईल. दिवसाची सुरुवात मंगलमय वातावरणात आणि सकारात्मक व्हावी ह्यासाठी चा हा प्रयत्न असेल. यासाठी मनपाचे कुठलेही आर्थिक योगदान नसेल.
स्टार्टअप
जेन झी (Gen Z) साठी प्रामुख्याने… महाराष्ट्र स्टार्टअप मध्ये अव्वल आहे, पण सगळे स्टार्टअप हे पुणे मुंबई सारख्या शहरातून येतात, त्यात नागपुर कुठे ही मागे न राहावा म्हणून एक अययावत स्टार्टअप इनक्युबेशन सेंटर बनवेल. महानगर पालिका जागा उपलब्ध करून देईल, शासन आणि महानगर पालिका तसेच डिपीसी च्या माध्यमातून नागपूर महानगर पालिका ‘जमशेदजी टाटा इनक्युबेशन सेंटर’ उभारेल.
तक्रार निवारण सेल
नागपूर महानगरपालिकेचे तक्रार निवारण सेल आय.टी. विभागाद्वारे संचालित करण्यात येते या माध्यमातून नगर सेवकांसाठी वेगळी यंत्रणा विभागाने तयार करावी. जेणेकरून सर्व नगरसेवक या यंत्रणेद्वारे आपल्या तक्रारींची नोंद करू शकतील. नगरसेवकांना आलेल्या तक्रारीचा फोलोअप टेक्नॉलॉजीच्या माध्यमातून येणे सोयीचे होईल व डॅशबोर्डच्या माध्यमातून त्याची नोंद नगरसेवकांकडे असेल. तसेच कमीतकमी मानवी हस्तक्षेप आणि जास्तीत जास्त यंत्रणेचा आणि डिजिटलीकरणासह आधुनिक प्रणाली व तंत्रज्ञानाच्या सहाय्याने जनतेची सेवा करणे अधिक प्रभावी ठरणार आहे.
नरवीर बाजीप्रभू देशपांडे उद्यान
पश्चिम नागपुरातील बाजीप्रभू नगर स्थित महानगरपालिकेच्या उद्यानाचे नाव नरवीर बाजीप्रभू देशपांडे करण्यात येईल.
डिजीटलायझेशन
डिजीटलायझेशन या उपक्रमांतर्गत नागपूर महानगरपालिकेकडून कर, पाणीपुरवठा आदी विविध विभागांसाठी अत्याधुनिक चॅटबॉट प्रणाली विकसित करण्यात येणार आहे. या प्रणालीमध्ये एआय-आधारित आऑडिओ व टेक्स्ट बॅटवॉट्सचा समावेश असेल, ज्यामुळे नागरिकांना त्यांच्या प्रश्नांची तत्काळ आणि अचूक उत्तरे मिळू शकतील.
डेटा सेंटर
डिजिटल युगात सुरक्षित आणि विश्वासार्ह डेटा व्यवस्थापन ही अत्यंत महत्त्वाची गरज बनली आहे. नागपूरमध्ये उभारणी होत असलेल्या डेटा सेंटर्सचा विचार करता, महानगरपालिकेने या क्षेत्रात दूरदृष्टीने ठोस पावले उचलणे आवश्यक आहे. महानगरपालिकेने स्वतः चे अत्याधुनिक डेटा सेंटर उभारून सर्व विभागांचा डेटा एकत्रित, सुरक्षित आणि सुलभ पद्धतीने व्यवस्थापित करणार आहे.
नागपूर जीरो कार्बन फुटप्रिंट च्या दिशेने अग्रेसर
‘सुसबिडी प्रकल्पामुळे नागपूर शहर शून्य-कार्बन फुटप्रिंटकडे पहिले ठोस पाऊल टाकले. ‘या उपक्रमातून स्वच्छ ऊर्जा, ऊर्जा बचत आणि पर्यावरणपूरक उपायांना चालना मिळून शहराच्या शाश्वत विकासाला गती मिळेल.
सुरेश भटांच्या काव्याने शेवट
स्थायी समितीच्या सभापती शिवानी दाणी-वखरे यांनी भाषणाचा शेवट कविवर्य सुरेश भट यांच्या काव्याने केला.
वादळांना सांगून ठेवा
आमची दिशा बदलणार नाही
नागपूरच्या विकासाचा दीप
कोणत्याही वार्याने विझणार नाही.