संदीप कांबळे,कामठी :- दोन दिवस झालेल्या मुसळधार पावसामुळे नागपूर जिल्ह्यात मोठ्या प्रमाणावर नुकसान झाले आहे. या मुसळधार पावसामुळे शेतीचे नुकसान झाले असून शेतकरी गंभीर परिस्थितीत आहेत. राज्यातील इतर भागांतही पावसामुळे पिकांचे मोठे नुकसान झाल्याचे समोर आले आहे. शासनाने तातडीने आर्थिक मदत जाहीर करावी, अशी मागणी हुकुमचंद आमघरे यांनी केली आहे.
बाजार समितीचे सभापती हुकुमचंद आमधरे यांनी या परिस्थितीवर तातडीने लक्ष वेधले आहे. त्यांनी मुख्यमंत्र्यांना पत्र लिहून शेतकऱ्यांच्या स्थितीबाबत माहिती दिली आणि त्यांच्या वेदनेवर प्रकाश टाकला. आमधरे यांच्या म्हणण्यानुसार, सरकारने सर्वेक्षणाची वेळ न घालता तातडीने प्रत्येक शेतकऱ्याच्या खात्यात ५० हजारांची आर्थिक मदत जमा करावी, जेणेकरून शेतकऱ्यांना त्यांच्या तातडीच्या गरजांसाठी साहाय्य मिळू शकेल. हुकुमचंद आमधरे यांनी शेतकऱ्यांसाठी या मदतीचे तातडीने वितरण होणे आवश्यक असल्याचे म्हटले आहे. सरकारी मदतीशिवाय अनेक शेतकरी आपली शेती व जीवन व्यवस्थापनात गंभीर अडचणींना सामोरे जावे लागेल. या मागणीमुळे राज्य शासनाकडे शेतकऱ्यांच्या वेदनेची दखल घेण्याची अपेक्षा निर्माण झाली आहे. स्थानिक शेतकरी संघटनांनाही हुकुमचंद आमघरे यांनी या मुद्द्यावर आवाज उठविण्याचे आवाहन केले आहे.