नागपूर १० : इमामवाडा पोलीस ठाण्याच्या हद्दीत टी.बी. वॉर्ड क्रमांक ४२ व ४४ मधील एका पडिक खंडहरात ५० वर्षीय अज्ञात व्यक्तीचा कुजलेला मृतदेह आढळून आल्याने परिसरात खळबळ उडाली आहे. पोलिसांनी मृतदेहाला पोस्टमार्टमसाठी रुग्णालयात पाठवले असून पुढील तपास सुरू आहे.
मिळालेल्या माहितीनुसार, स्थानिक नागरिकांना काल संध्याकाळी परिसरातून दुर्गंधी येत असल्याचे जाणवले. त्यांनी तत्काळ पोलिसांना कळवले. घटनास्थळी पोहोचलेल्या पोलिसांना अंदाजे ५० वर्षीय पुरुषाचा मृतदेह सडलेल्या अवस्थेत आढळला. प्रत्यक्षदर्शींनी सांगितले की, तो व्यक्ती वारंवार बेवारस अवस्थेत या भागात फिरताना दिसत असे.
पोलिसांनी मृतदेह पुढील कार्यवाहीसाठी मेयो मेडिकल हॉस्पिटलला पाठवला आहे. सुरक्षा रक्षक पवन धनराज राऊत यांनी दिलेल्या माहितीनुसार इमामवाडा पोलीस ठाण्यात आकस्मिक मृत्यूची नोंद करण्यात आली आहे. सध्या पोलिस अधिक तपास करीत आहेत.
