– मनपा व रोटरी क्लब ईशान्यचा संयुक्त उपक्रम
नागपूर :- नागपूर महानगरपालिकेच्या शाळांमधील दहावीच्या वर्गातील 1100 विद्यार्थ्यांना अमृतछाया अभियानाअंतर्गत रेनकोट व छत्रीचे वितरण महापौर निता ठाकरे, आमदार कृष्णा खोपडे व शिक्षण विशेष समिती सभापती संतोषदेवी लढ्ढा यांच्या हस्ते करण्यात आले.
नागपूर महानगरपालिका व रोटरी क्लब ईशान्यच्या संयुक्त विद्यमाने हा अमृतछाया अभियान कविवर्य सुरेश भट सभागृहात आयोजित केला होता. यावेळी उपमहापौर लिला हाथीबेड, उपायुक्त डॉ. मेघना वासनकर, नेहरुनगर झोन सभापती ज्योती देवघरे, उपसभापती भारती बुंदे, नगरसेविका वैशाली उदापूकर, नगरसेविका वर्षा डोंगरे, सहायक आयुक्त नरेंद्र बावनकर, शिक्षणाधिकारी वंदना महाजन, रोटरी क्लबचे निलेश राठी, धीरज साबू उपस्थित होते.
सामाजिक बांधिलकीची शिकवण – महापौर ठाकरे
यावेळी बोलताना महापौर निता ठाकरे यांनी रोटरी क्लबने सामाजिक बांधिलकी मानून या उपक्रमाला यशस्वी करण्यासाठी दिलेल्या योगदानाबद्दल आभार व्यक्त केले. त्याचप्रमाणे विद्यार्थ्यांनी सुद्धा जाणीव ठेऊन परीक्षांमध्ये यश संपादन करावे, असे आवाहन केले व विद्यार्थ्यांच्या उज्वल भविष्यासाठी शुभेच्छा दिल्या. या उपक्रमातून सामाजिक बांधिलकीची शिकवण मिळत असल्याचे त्यांनी सांगितले.
पूर्व नागपूरचे आमदार कृष्णा खोपडे यांनी विद्यार्थ्यांना मोबाईल पासून दूर राहण्यासाठी आवाहन केले. त्यांनी सांगितले की, दहावीच्या विद्यार्थ्यांनी काळजी पूर्वक शिक्षणाकडे लक्ष देण्याची आवश्यकता आहे. त्यांनी शिक्षण समिती सभापती संतोष देवी लढ्ढा यांचे मनपा शाळेत अभिनव उपक्रम आयोजित करण्यासाठी अभिनंदन केले. त्यांनी विद्यार्थ्यांना रेनकोट आणि छत्री वितरण करण्यासाठी रोटरी क्लब ऑफ ईशान्य यांचे आभार मानले.
शिक्षण समिती सभापती संतोष देवी लढ्ढा यांनी आपल्या प्रास्ताविक भाषणात महिला शिक्षणाची प्रेरणा सावित्री बाई फुले यांच्या महिला शिक्षणासाठी केलेल्या प्रयत्नांची माहिती दिली. त्यांनी सांगितले की, आजच्या काळात मुलांनी संवेदनशील होण्याची आवश्यकता आहे. यातून चांगल्या चरित्राचे निर्माण होते. त्यांनी रोटरी क्लब ऑफ ईशान्य चे विद्यार्थ्यांना रेनकोट आणि छत्री वितरण करण्यासाठी आभार मानले. रोटरी क्लब ऑफ ईशान्य चे अध्यक्ष निलेश राठी यांनी आपल्या भाषणात सामाजिक बांधिलकीतून मनपा शाळेतील विद्यार्थ्यांना रेनकोट आणि छत्री चे वितरण करण्यात आले आहे. कार्यक्रमांचे संचालन शुभांगी पोहरे यांनी केले.
आभार प्रदर्शन शिक्षणाधिकारी वंदना महाजन यांनी केले. या प्रसंगी शिक्षण विभागाचे सुभाष उपासे, प्रशांत टेंभुर्णे, विनय बगळे यांच्यासह इतर उपस्थित होते. मुख्य कार्यक्रमानंतर करियर सल्लागार प्रणाली सरोदे यांनी मुलांना दहावी नंतर काय करायचे याचे उत्तम मार्गदर्शन केले.