ओबीसी आरक्षणाच्या प्रश्नावर राज्यभर तापलेले आंदोलन आणखी भडकण्याची चिन्हे दिसत आहेत. ओबीसी नेते लक्ष्मण हाके यांच्या गाडीवर आज दुपारी अज्ञात तरुणांनी काठ्यांनी हल्ला केला. हा प्रकार अहिल्यानगर शहरालगत असलेल्या अरणगाव बाह्यवळण रस्त्यावर घडला असून या घटनेने परिसरात तणावाचे वातावरण निर्माण झाले आहे.
मिळालेल्या माहितीनुसार, हाके हे आपल्या सहकाऱ्यांसह नाश्ता करून पुढे जात होते. याच दरम्यान बाह्यवळण रस्त्यावर काही अज्ञात तरुणांनी अचानक गाडी अडवून काठ्या व लाकडी रॉडने गाडीवर तुटून पडले. गाडीचे मोठ्या प्रमाणावर नुकसान झाले असून हल्ल्यामुळे हाके यांचे समर्थक आक्रोशित झाले आहेत. हाके हे आज पाथर्डी तालुक्यातील दैत्य नांदूर येथे होणाऱ्या ओबीसी एल्गार सभेसाठी जात होते. राज्यातील ओबीसी आरक्षणासाठी सुरु असलेल्या लढ्याच्या पार्श्वभूमीवर या सभेला मोठे महत्त्व होते. अशा वेळी झालेला हा हल्ला आंदोलनकर्त्यांमध्ये संतापाची लाट उसळवत आहे.
माहिती कळतच पोलीस प्रशासन दाखल
घटनेची माहिती मिळताच पोलीस तातडीने घटनास्थळी दाखल झाले. सध्या अहिल्यानगर तालुका पोलीस ठाण्यात गुन्हा दाखल करण्याचे काम सुरू आहे. दरम्यान, हल्लेखोर कोण आहेत आणि त्यांच्या मागे नेमके कोणते हात आहेत, याचा तपास सुरू आहे. हाके यांच्या गाडीवरील हल्ल्यामुळे ओबीसी आंदोलन अधिक तीव्र होण्याची शक्यता असून राज्यातील राजकीय वातावरण चांगलेच तापण्याची चिन्हे दिसत आहेत.
बीडमध्ये होणारा ओबीसी महामेळावा रद्द करण्यात आला आहे. पावसामुळे हा निर्णय घेण्यात आल्याची माहिती सुभाष राऊतांनी केली आहे. बीडमध्ये पावसामुळे शेतकऱ्यांचे मोठ्या प्रमाणात नुकसान झाले आहे. सर्व शेतपिकांची नासधूस झाली असून सरकारने मोठी मदत करावी अशी मागणी विरोधी पक्षांनी लावून धरली आहे.
source : abp maza