मुंबई प्रतिनिधी ता ३-
मनोज जरांगे-पाटील यांना मुंबई पोलिसांनी नोटीस बजावली असून, त्यांनी तातडीने आझाद मैदान रिकामे करण्याचे निर्देश दिले आहेत. आंदोलन करण्यासाठी न्यायालयाने आणि पोलिसांनी घातलेल्या अटी व शर्तींचे उल्लंघन झाल्यामुळे ही कारवाई करण्यात आली आहे.
जरांगे-पाटील यांनी २९ ऑगस्टपासून मुंबईतील आझाद मैदानात बेमुदत उपोषण सुरू केले आहे. आंदोलनाविरोधात दाखल केलेल्या याचिकेवर मुंबई उच्च न्यायालयाने सोमवारी (दि. १) तातडीने सुनावणी घेतली. यावेळी न्यायालयाने आंदोलनादरम्यान नियमांचे उल्लंघन होत असल्याबद्दल नाराजी व्यक्त केली. यानंतर, नियमांचे उल्लंघन केल्याप्रकरणी मनोज जरांगे पाटील यांच्या कोअर कमिटीला मुंबई पोलिसांनी नोटीस बजावली आहे.
पोलिसांच्या नोटीसमधील प्रमुख मुद्दे:
- आंदोलनासाठी दिलेल्या अटी व शर्तींचे उल्लंघन झाले आहे.
- न्यायालयाच्या निर्देशानुसार, आझाद मैदान तातडीने रिकामे करावे.
- जरांगे-पाटील यांनी प्रसारमाध्यमांशी बोलताना केलेल्या विधानांचीही दखल नोटीसमध्ये घेण्यात आली आहे.
या नोटीसनंतर जरांगे-पाटील यांनी मागितलेल्या पुढील आंदोलनाच्या परवानग्याही नाकारण्यात आल्या आहेत. या कारवाईमुळे मराठा आरक्षण आंदोलनापुढील आव्हाने वाढली आहेत.