– आदेश धुडकावणाऱ्या मुख्याध्यापकावर फौजदारी गुन्हा दाखल
नागपूर :- नागपूर महानगरपालिका सार्वत्रिक निवडणूक २०२५-२६ च्या पार्श्वभूमीवर निवडणूक कर्तव्यात बेजबाबदारपणा दाखवणाऱ्या कर्मचाऱ्यांविरुद्ध मनपाने कडक कारवाईला सुरुवात केली आहे. निवडणूक प्रशिक्षणाचे आदेश स्वीकारण्यास नकार देणाऱ्या विविध शाळांच्या चार मुख्याध्यापकांवर भारतीय न्याय संहिता २०२३ कलम २२३ अंतर्गत फौजदारी गुन्हा दाखल करण्याचे आदेश निवडणूक निर्णय अधिकारी यांनी निर्गमित केले आहे. डी.जी. धार्मिक, एम. ए.शेख व जयश्री सलामे, पुष्पा दाभेकर असे मुख्याध्यापकांची नावे आहेत.
राज्य निवडणूक आयोगाच्या निर्देशानुसार, मनपाच्या निवडणूक विभागाने २१ डिसेंबर २०२५ रोजी मतदान अधिकाऱ्यांच्या नियुक्त्या जाहीर केल्या होत्या. या अंतर्गत सिव्हील लाईन्स, सदर येथील मुख्याध्यापक एम. ए. शेख, ईश्वर नगर, रमणा मारोती रोड येथील मुख्याध्यापक डी.जी. धार्मिक, मुख्याध्यापिका पुष्पा दाभेकर आणि शांती नगर येथील मुख्याध्यापिका जयश्री सलामे यांचीही नियुक्ती करण्यात आली होती. निवडणूक विभागाचे कर्मचारी जेव्हा त्यांच्या दिलेल्या पत्त्यावर नियुक्तीचा अधिकृत आदेश देण्यासाठी गेले तेव्हा यांनी तो आदेश स्वीकारण्यास नकार दिला.
सक्षम प्राधिकाऱ्याने दिलेल्या आदेशाचे उल्लंघन करणे हा कायदेशीर गुन्हा आहे. याप्रकरणी मुख्यध्यापकांविरुद्ध भारतीय न्याय संहिता २०२३ मधील कलम २२३ (लोकसेवकाने जारी केलेल्या आदेशाची अवज्ञा करणे) अन्वये गुन्हा दाखल करण्याची प्रक्रिया सुरू करण्यात आली आहे. मनपाच्या स्वच्छता विभागातील निरीक्षकांना पोलीस ठाण्यात तक्रार दाखल करण्यासाठी प्रशासनाकडून अधिकृतपणे प्राधिकृत करण्यात आले आहे.
निवडणूक हे लोकशाहीतील अत्यंत महत्त्वाचे राष्ट्रीय कार्य आहे. यामध्ये कोणत्याही प्रकारचा बेजबाबदारपणा किंवा अडथळा खपवून घेतला जाणार नाही, असा स्पष्ट संकेत मनपा आयुक्तांनी दिला आहे. यापूर्वीही निवडणूक कामात टाळाटाळ करणाऱ्यांवर कारवाईचे संकेत देण्यात आले होते. आता थेट फौजदारी गुन्हा दाखल करून मोठी कारवाई करण्यात येत आहे.