– “व्हीएनआयटी ते काचीपुरा चौक” दरम्यानच्या कामाचा घेतला आढावा
– अतिक्रमण हटवण्यासह आणि दुकानांसाठी वेंडर पॉलिसी तयार करण्याचे दिले निर्देश
नागपूर :- नागपूर महानगरपालिकेच्या स्थायी समिती सभापती शिवानी दाणी-वखरे यांनी (ता.03) व्हीएनआयटी ते बजाजनगर चौक ते काचीपुरा चौक दरम्यानच्या ‘वॉकेबल स्ट्रीट’च्या कामांची पाहणी केली.
यापाहणी दरम्यान लक्ष्मीनगर झोनच्या सभापती तारा (लक्ष्मी) यादव, नगरसेविका वर्षा चौधरी, मनपा उपायुक्त मंगेश खवले, सहायक आयुक्त धनंजय जाधव, प्रकल्प विभागाच्या कार्यकारी अभियंता अल्पना पाटणे, कार्यकारी अभियंता रवींद्र बुंधाडे, उपअभियंता आनंद मोखाडे आणि झोनल स्वच्छता अधिकारी लोकेश बासनवार यांच्यासह मनपाचे इतर वरिष्ठ अधिकारी व कर्मचारी उपस्थित होते.
पाहणीदरम्यान स्थायी समिती सभापती शिवानी दाणी-वखरे यांनी वॉकेबल स्ट्रीटच्या कामाचा सविस्तर आढावा घेतला, काही ठिकाणी आढळलेल्या त्रुटी लक्षात घेऊन कामात आवश्यक दुरुस्ती करण्याचे निर्देश त्यांनी संबंधित अधिकाऱ्यांना दिले. नागरिकांना चालताना कोणतीही अडचण येऊ नये यासाठी या संपूर्ण मार्गावरील अतिक्रमण तातडीने हटवण्याच्या सूचनाही त्यांनी दिल्या. याशिवाय, वॉकेबल स्ट्रीटवरील दुकाने लीजवर देण्याकरिता योग्य ती ‘वेंडर पॉलिसी’ लवकरात लवकर तयार करण्याचे निर्देश ही त्यांनी स्थावर विभागाचे उपायुक्त मंगेश खवले यांना दिले.
