– पोटा ग्रामस्थांचा पाणीपुरवठा सुरू करण्याची मागणी; पाईपलाईन व टाकीच्या गुणवत्तेची तपासणी करण्याचीही मागणी
सिल्लेवाडा प्रतिनिधी
पोटा, ता. सावनेर :- शासनाच्या महत्त्वाकांक्षी जल जीवन मिशन योजनेचे काम पोटा येथे मागील तीन वर्षांपासून सुरू असतानाही अद्याप अनेक नागरिकांना योजनेचा अपेक्षित लाभ मिळालेला नसल्याची तक्रार ग्रामस्थांनी केली आहे. गावात पाण्याची टाकी बांधून जवळपास तीन वर्षे उलटली असून अनेक घरांना अद्याप वैयक्तिक नळजोडणी मिळालेली नसल्याने पिण्याच्या पाण्याचा प्रश्न कायम असल्याचे ग्रामस्थांचे म्हणणे आहे.
योजनेअंतर्गत पाईपलाईन टाकण्यासाठी गावातील विविध रस्ते खोदण्यात आले होते. मात्र, संबंधित रस्ते अद्याप पूर्णपणे पूर्ववत करण्यात आले नसल्याने नागरिकांना ये-जा करताना अडचणींचा सामना करावा लागत असल्याची तक्रार आहे. पाईपलाईनचे काम पूर्ण होऊन बराच कालावधी लोटला असल्याने पाणीपुरवठा सुरू करण्यापूर्वी मुख्य पाईपलाईनची तांत्रिक तपासणी, गळती चाचणी आणि आवश्यक गुणवत्तेची पडताळणी करण्यात यावी, अशी मागणी ग्रामस्थांकडून करण्यात आली आहे.
दरम्यान, गावात उभारण्यात आलेल्या पाण्याच्या टाकीच्या बांधकामाच्या गुणवत्तेबाबतही काही ग्रामस्थांनी प्रश्न उपस्थित केले आहेत. टाकीचे बांधकाम अपेक्षित दर्जानुसार झाले आहे का, याची संबंधित विभागाच्या अधिकाऱ्यांनी प्रत्यक्ष पाहणी करून तांत्रिक तपासणी करावी, अशी मागणी करण्यात आली आहे. शासनाच्या निधीतून राबविण्यात येणाऱ्या या कामाची गुणवत्ता आणि प्रगती याबाबत पारदर्शकता ठेवण्याची गरज असल्याचे ग्रामस्थांनी सांगितले.
जल जीवन मिशनचा मुख्य उद्देश ग्रामीण भागातील प्रत्येक कुटुंबाला सुरक्षित व नियमित पिण्याचे पाणी उपलब्ध करून देणे हा आहे. मात्र, पोटा येथे योजनेचे काम दीर्घकाळ अपूर्ण राहिल्याने नागरिकांना अद्याप पाण्यासाठी अडचणींचा सामना करावा लागत असल्याचे ग्रामस्थांचे म्हणणे आहे. त्यामुळे संबंधित विभागाने कामाची सद्यस्थिती स्पष्ट करून उर्वरित कामे तातडीने पूर्ण करण्याची मागणी होत आहे.
गावातील प्रलंबित नळजोडण्या पूर्ण करणे, पाणीपुरवठा व्यवस्था कार्यान्वित करण्यापूर्वी पाईपलाईनची तांत्रिक तपासणी करणे, पाण्याच्या टाकीच्या बांधकामाची गुणवत्ता तपासणे आणि खोदण्यात आलेले रस्ते पूर्ववत करणे, या मागण्यांकडे संबंधित विभागाने तातडीने लक्ष द्यावे, अशी मागणी पोटा येथील ग्रामस्थांनी केली आहे. योजनेचा निधी खर्च होऊनही नागरिकांना प्रत्यक्ष पाणीपुरवठ्याचा लाभ मिळत नसेल, तर त्यामागील कारणांची प्रशासनाने चौकशी करून काम पूर्णत्वास नेण्याची गरज आहे.