नागपूर :- माझ्या मनात अपार आनंद आणि अभिमानाची भावना आहे की एआयआयएमएस नागपूरचे मुख्य कार्यकारी अधिकारी व संचालक डॉ. प्रशांत जोशी आणि बालरोग विभाग प्रमुख प्रा. मीनाक्षी गिरीश यांनी दिलेल्या वैयक्तिक आमंत्रणामुळे मला या आगळ्या-वेगळ्या सामाजिक उपक्रमात सहभागी होण्याची संधी मिळाली. या प्रसंगी बालरोग विभागातील लहान देवदूतांबरोबर दीपावली साजरी करताना त्यांच्या आणि त्यांच्या पालकांच्या चेहऱ्यावर झळकणारा आनंद आणि उत्साह पाहून मन हेलावून गेले. या तेजस्वी सणात आशेचा आणि आनंदाचा प्रकाश खऱ्या अर्थाने पसरलेला दिसला. या उपक्रमांतर्गत सुमारे ५० बालरुग्णांना पौष्टिक राजगिऱ्याची चिक्की, गव्हाचे बिस्किटे आणि वयोगटानुसार योग्य खेळणी वाटण्यात आली. या छोट्याशा भेटवस्तूंनी मुलांच्या आणि त्यांच्या कुटुंबीयांच्या चेहऱ्यावर आनंद फुलला. विशेष आभार डॉ.निलेश नागदेवे, वैद्यकीय अधीक्षक आणि डॉ.(सौ.) नीता जोशी, वरिष्ठ बालरोगतज्ज्ञ व संचालकांच्या सहचारिणी यांचे, ज्यांनी या संस्मरणीय कार्यक्रमाला आपली उपस्थिती लावून तो अधिक खास बनविला. एआयआयएमएस नागपूरमधील सर्व डॉक्टर, परिचारिका आणि कर्मचारीवर्ग यांच्या समर्पित, नि:स्वार्थ आणि निष्ठावान सेवाभावाबद्दल आम्ही मनःपूर्वक कृतज्ञता व्यक्त करतो. त्यांच्या अथक प्रयत्नांमुळेच समाजातील दुःखित घटकांमध्ये आशेचा किरण उजळतो.
