नागपूर :- नागपूर शहर पोलीस आयुक्तालयाच्या ‘ऑपरेशन थंडर’ अभियानांतर्गत अंबाझरी पोलीस ठाण्याच्या सहकार्याने धरमपेठ झोन क्र. २ येथील मनपा समुपदेशन केंद्रात अंमली पदार्थविरोधी जनजागृती कार्यक्रम उत्साहात पार पडला.
कार्यक्रमाला धरमपेठ झोन क्र. २ च्या सभापती धनश्री देशपांडे, सहाय्यक पोलीस निरीक्षक मिना बारंगे, समाज विकास विभागाच्या समूह संघटक अनिता वर्धट व समुपदेशन केंद्राच्या संचालिका नंदा कोल्हटकर उपस्थित होत्या. परिसरातील महिला व नागरिकांनी मोठ्या संख्येने सहभाग घेतला.
यावेळी API मिना बारंगे यांनी अंमली पदार्थांचे वाढते व्यसन, त्याचे आरोग्य व समाजावर होणारे दुष्परिणाम याविषयी मार्गदर्शन करून संशयास्पद माहिती तात्काळ पोलिसांना देण्याचे आवाहन केले. नंदा कोल्हटकर यांनी महिला हक्क, कौटुंबिक कायदे व बालसंरक्षण विषयक माहिती दिली, तर धनश्री देशपांडे यांनी व्यसनमुक्ती व महिला सक्षमीकरणाचे महत्त्व अधोरेखित केले. कार्यक्रमाचे आभार प्रदर्शन अनिता वर्धट यांनी केले. या उपक्रमामुळे अंमली पदार्थांविरोधात जनजागृती निर्माण होऊन व्यसनमुक्त समाज घडविण्यास हातभार लागेल, असा विश्वास उपस्थितांनी व्यक्त केला.